Úkimet búgin «Taza Qazaqstan» bastamasynyń júzege asyrylýyn talqylaıdy
ASTANA. KAZINFORM – Búgin Úkimet otyrysy ótedi. Onda mınıstrler kabınetiniń músheleri Memleket basshysynyń «Taza Qazaqstan» bastamasynyń júzege asyrylý barysyn talqyǵa salady.
Otyrys barysynda negizgi baıandamany Ekologııa jáne tabıǵı resýrstar mınıstri Erlan Nysanbaev jasaıdy. Mınıstr osy jyldyń basynan beri ekologııalyq bastama aıasynda júzege asyrylǵan respýblıkalyq jáne halyqaralyq aktsııalardyń nátıjelerine basa nazar aýdartady. Sondaı-aq ótken jyly iske qosylǵan @TazaQazBot telegramm-chat-botyna turǵyndar tarapynan eń kóp túsetin máselelerdi ataıdy. Qatty turmystyq qaldyqtardy jınaý, shyǵarý jáne qaıta óńdeý úshin zamanaýı ınfraqurylymdy qalyptastyrý baǵytynda atqarylatyn jumystarǵa toqtalady. Eldi mekenderdi kógaldandyrý jáne eldiń ormandylyǵyn arttyrý máselelerine de nazar aýdartady.
Jıyn qorytyndysy boıynsha baspasóz konferentsııasy ótedi. Onda myna laýazymdy tulǵalar BAQ ókilderi tarapynan týyndaǵan saýaldarǵa jaýap beredi:
- Ekologııa jáne tabıǵı resýrstar mınıstri Erlan Nysanbaev;
- Ekologııa jáne tabıǵı resýrstar vıtse-mınıstrleri Nurken Shárbıev pen Jomart Álıev;
- qoǵamdyq birlestikter men uıymdardyń ókilderi.
Úkimet otyrysy PrimeMinister.kz saıtynan, YouTube resmı arnasynda, Facebook áleýmettik jelisinde, sondaı-aq UKIMET Telegram-kanalynda tikeleı kórsetiledi.
Baspasóz konferentsııasynyń tikeleı efıri YouTube resmı arnasynda jáne Facebook áleýmettik jelisinde júredi.
Esterińizge sala ketsek, Memleket basshysy Qasym-Jomart Toqaevtyń qoldaýymen elimizde alǵash ret 2024 jyldyń 6 sáýiri men 11 mamyry aralyǵynda «Taza Qazaqstan» respýblıkalyq ekologııalyq aktsııasy ótken bolatyn. Aýqymdy ekologııalyq aktsııa bes aptaǵa sozyldy. Olardyń árqaısysy belgili bir taqyrypqa arnaldy. Sol kezde sáýirdiń 13-ne deıin ótkizilgen «Taza ólke» aptalyǵy barysynda aýmaqtar men turǵyn úı aýlalary tazartyldy. Odan keıingi «Kıeli meken» aptalyǵy tarıhı-mádenı eskertkishter aýmaǵyn abattandyrý jumystaryna arnaldy. «Jasyl aımaq» aptalyǵy aǵash kóshetterin otyrǵyzýmen, ekpelerdi aqtaýmen atalyp ótti. Al «Ónegeli urpaq» aptalyǵy kezinde ardagerler men qarttar úıleriniń aýmaǵy men aýlasy tazartylyp, abattandyryldy. Sońǵy «Móldir bulaq» aptalyǵy barysynda sý aıdyndary - ózen, kólderdiń jaǵasy kúl-qoqystan tazartyldy.
Sondaı-aq sol jyly 2024-2029 jyldarǵa arnalǵan «Taza Qazaqstan» ekologııalyq mádenıetin damytý tujyrymdamasy bekitildi. Ol mynadaı negizgi baǵyttar boıynsha iske asyrylady:
- ekologııalyq oılaý jáne minez-qulyq, sonyń ishinde yntalandyrý jáne olardy kótermeleý sharalary;
- ekologııalyq bilim;
- ekologııalyq bilim jáne aqparattyq nasıhat.
Árbir baǵyt boıynsha tujyrymdamany iske asyrý boıynsha qabyldanatyn sharalardyń tıimdiligin monıtorıngileýge jáne qajet bolǵan jaǵdaıda olardy túzetýge múmkindik beretin tıisti ındıkatorlar aıqyndaldy.
Ótken jyly Almatydaǵy Ǵylym ordasynda sóz sóılegen Prezıdent qasym-Jomart Toqaev «Taza Qazaqstan» aktsııasy - jaı naýqan emes, halqymyzdyń kózqarasyn, bolmysyn ózgerte alatyn óte mańyzdy joba ekendigin basa aıtqan bolatyn.
- Aýqymdy ekologııalyq bastamaǵa, ásirese jastar belsene atsalysty. Bul da – jaqsy úrdis. Az ýaqyt ishinde 2,5 mln astam aǵash egildi, 200-den astam ózen-kóldiń jaǵasy tazartyldy. Osy bastama turaqty jalǵasyp, jaqsy dástúrge aınalýy qajet. Bul aktsııa tal egip, qoqys jınaýmen shektelmeýge tıis. Atqarylatyn basqa da sharýa kóp. Eń bastysy, barlyǵy shyn nıetpen jasalýy kerek, - degen edi Qasym-Jomart Kemeluly.
Memleket basshysy bul bastamanyń mańyzdylyǵyn alqaly jıyndarda únemi aıtyp keledi. Tipti, ózgelerge úlgi-ónege kórsetip, ózi de elordamyzda uıymdastyrylatyn ekologııalyq aktsııalarǵa qatysyp turady.
Máselen, osy jyldyń sáýirinde Astanada ótken «Taza Qazaqstan» ekologııalyq festıvalinde tazalyqtyń máni men maǵynasy jaıyndaǵy pikirimen bólisip, oıdyń da, boıdyń da, qorshaǵan ortanyń da tazalyǵyn saqtaý - ár adamnyń ishki mádenıetiniń kórsetkishi ekenin atap ótti. Sondyqtan tazalyq halqymyzdyń bolmysyna sińgen qasıet bolýy qajet ekenin únemi aıtyp kele jatqanyn eske saldy.
– Tazalyq ár adamnan, ár úıden, árbir kóshe men ár qaladan bastalýy kerek. Óıtkeni, «Taza Qazaqstan», bul – bir kúndik naýqan emes. Bul – bizdiń ómir saltymyz. «Jas kelse – iske» dep halqymyz beker aıtpaǵan. Barshańyzdy tabıǵatty qorǵaý ıdeıasy biriktirip otyr. Sizder bárińiz birge istep jatqan jumystyń arqasynda bul ıgi bastama osyndaı úlken qozǵalysqa aınaldy. Ortaq iske kúsh jumyldyrý degenimiz – osy, – dedi Prezıdent.
Aıta keteıik, jyl basynda ótken Úkimet otyrysynda «Taza Qazaqstan» bastamasynyń bir jyldaǵy nátıjesi qaralyp, onda Ekologııa jáne tabıǵı resýrstar mınıstri Erlan Nysanbaev negizgi baıandama jasaǵan edi. Onyń dereginshe, «Taza Qazaqstan» bastamasynyń aıasynda 2024 jyly keshendi sharalar qabyldandy. Nátıjesinde 2019-2023 jyldary orta eseppen 62 ekologııalyq aktsııa ótkizilse, 2024 jyly bul kórsetkish 183-ke jetti. Eger ótken 5 jylda aktsııalarǵa 2,4 mln adam qatysyp, 900 myń tonna qoqys jınalyp, shamamen 2,5 mln jasyl jelek otyrǵyzylsa, 2024 jyly ekologııalyq aktsııalarǵa 6,2 mln adam qatysyp, 1,1 mln tonna qoqys jınaldy, shamamen 1,6 mıllıon aǵash egildi.