Úkimet búgin Prezıdent Joldaýyn júzege asyrý joldaryn pysyqtaıdy
ASTANA. KAZINFORM – Búgin saǵat 10:00-de Úkimet úıinde Úkimet otyrysy ótedi. Basty taqyryp Prezıdent Joldaýyn iske asyrý jaıy bolmaq.
Aıta keteıik, keshe Parlament palatalarynyń birlesken otyrysynda Memleket basshysy Qasym-Jomart Toqaev «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýyn jarııa etti. Osy Joldaýda Mınıstrler kabıneti aldyna qadaý-qadaý tapsyrmalar júktelgen edi. Endi búgin mınıstrler osynaý strategııalyq qujattaǵy ózderi basqaryp otyrǵan vedomstvoǵa qatysty tapsyrmalardyń qalaı iske asyrylatynyn baıandamaq.
Máselen, Prezıdent jappaı tsıfrlandyrý jáne jasandy ıntellekt tehnologııasyn barynsha engizý arqyly ekonomıkany jańǵyrtýymyz qajettigin, ol úshin Tsıfrlyq kodeksti tezirek qabyldaǵan jón ekenin aıtty. Osy maqsatta qazirgi Tsıfrlyq damý, ınnovatsııalar jáne aeroǵarysh ónerkásibi mınıstrligi negizinde Jasandy ıntellekt jáne tsıfrlyq damý mınıstrligi qurylyp, ony Premer-mınıstrdiń orynbasary deńgeıindegi maman basqarmaq. Atalǵan baǵytta qolǵa alynatyn is-sharalar jaıynda qazirgi Tsıfrlyq damý mınıstri Jaslan Mádıev baıandama jasaýy múmkin.
Memleket basshysy toqtalǵan mańyzdy mindetterdiń biri – aýyl sharýashylyǵyn jańa deńgeıge kóterý. Al ozyq agroekonomıkaǵa kóshý úshin Úkimettiń naqty jospary bolýy, ár aımaqta daıyn ónimdi óndiristen dúken sóresine deıin jetkizetin árbir óńirdiń ereksheligine qaraı birtutas jeli qalyptasýy kerek. Mal sharýashylyǵy salasyndaǵy agrobıznesti qoldaý josparyn ázirlep, naqty qarjylandyrý sharalaryn bastaý qajet. Aýyl sharýashylyǵy ǵylymyn damytýdyń naqty jospary bolǵany jón. Bul qujat tsıfrlyq tehnologııalardy qoldanýǵa jáne osy salanyń ónimdiligin edáýir arttyrýǵa arnalǵan jospar bolýǵa tıis. Bul máseleler jóninde otyrysta Aýyl sharýashylyǵy mınıstri Aıdarbek Saparov sóz sóıleýi yqtımal.
Joldaýda kóterilgen taǵy bir mańyzdy baǵyt - kólik-logıstıkany odan ári damytý. Ol úshin «Soltústik – Ońtústik» kólik dálizi, «Shyǵys – Batys» dálizi, Transkaspıı kólik baǵyty sııaqty negizgi dálizder aıasynda avtomobıl joldaryn damytýǵa basa mán berý, kólik júıesin basqarýdyń jańa úlgisin jasaý qajet. Joldaýdaǵy osy jáne ózge de tapsyrmalardyń qalaı oryndalatyny jaıynda Kólik mınıstri Nurlan Saýranbaev esep berýi múmkin.
Qasym-Jomart Toqaev Joldaýda ekonomıkany jan-jaqty jańǵyrtý jumystary adam kapıtalyn damytýǵa qatysty jańa mindetter júkteıtindigine aıryqsha nazar aýdartty. Bul baǵytta mektep oqýshylaryna arnalǵan jasandy ıntellekt negizderi týraly baǵdarlama jáne oqý materıaldaryn ázirleý, ustazdardyń jasandy ıntellekt tehnologııasyn meńgerý daǵdysyn qalyptastyrý qajet. Qashyqtan oqytý tásili jáne jasandy ıntellekt tehnologııasy negizinde «Qazaq Digital Mektebi» atty shaǵyn jınaqty mektep úlgisin ázirleý kerek.
Joǵary bilim salasynda jasandy ıntellektini keńinen qoldanatyn ýnıversıtetterge kóbirek derbestik berý, daryndy zertteýshilerdi qoldaý úshin qosymsha sharalar qabyldaý, bilikti mamandarymyzdy elge qaıtarýdyń tıimdi tásilderin oılastyryp, qoldanysqa engizý qajet. Bilim salasyndaǵy bul tapsyrmalarǵa qatysty qandaı is-sharalar qolǵa alynatyndyǵyna Oqý-aǵartý mınıstri Ǵanı Beısembaev pen Ǵylym jáne joǵary bilim mınıstri Saıasat Nurbek toqtalmaq.
Jalpy, Úkimet otyrysy barysynda barlyq derlik mınıstr baıandama jasap, Joldaý aıasynda týyndaıtyn tapsyrmalardyń qalaı oryndalatyny jaıynda tolyqqandy málimet beredi.