Úkimet búgin egin jınaý naýqanyn talqyǵa salady

ASTANA. KAZINFORM – Búgin saǵat 10:00-de Úkimet otyrysy ótip, onda egin jınaý naýqany barysy talqylanady.

Otyrys qorytyndysy boıynsha ótetin baspasóz konferentsııasynda Aýyl sharýashylyǵy mınıstri Aıdarbek Saparov pen Saýda jáne ıntegratsııa mınıstri Arman Shaqqalıev BAQ ókilderi tarapynan týyndaǵan saýaldarǵa jaýap beredi.

Aýyl sharýashylyǵy mınıstrliginiń 22 qyrkúıektegi málimetterine sáıkes, Dándi jáne dándi-burshaqty daqyldardyń boljamdy jınaý alańy 16 mln gektardan asady. Búgingi tańda 9,8 mln gektar nemese jalpy egis alqaptarynyń 61,1 paıyzy jınaldy. Nátıjesinde 14,8 mln tonna astyq bastyryldy. Dándi daqyldardan bólek, aýyl sharýashylyǵy taýaryn óndirýshiler 656,1 myń tonna maıly daqyl, gektaryna 227,4 tsentner ónimdilikpen 1,8 mln tonna kartop jáne gektaryna 297,9 tsentner ónimdilikpen shamamen 2,8 mln tonna kókónis jınady. Atap aıtqanda, 323,9 ts/ga ónimdilikpen 404 myń tonnadan astam qyryqqabat, 412,5 ts/ga ónimdilikpen 717,3 myń tonna pııaz, sondaı-aq 290,4 ts/ga ónimdilikpen 282,8 myń tonna sábiz qoımaǵa tústi.

Foto: Aqorda

Taıaýda Memleket basshysy Qasym-Jomart Toqaev Aqmola oblysynyń Zerendi aýdanynda aımaq sharýalarymen egin jınaý naýqanyna arnalǵan keńes ótkizgen edi. Sol kezde Prezıdent aýyl sharýashylyǵyn damytýǵa bıýdjetten qomaqty qarajat bólinip jatqanyna toqtaldy.

– Demek, istelip jatqan árbir jumystyń, árbir sharanyń naqty nátıjesi bolýǵa tıis. Bir sózben, aýyl sharýashylyǵyna oń yqpal etýi kerek. Memleket adal jumys isteıtin dıqandarǵa árdaıym qoldaý kórsetedi. Aýyl sharýashylyǵynyń jaı-kúıi meniń erekshe baqylaýymda, bul salaǵa basa mán beremin. «Jumyla kótergen júk jeńil» deıdi bizdiń halqymyz. Sondyqtan birlese otyryp, osy mańyzdy naýqandy ýaqytynda jáne tabysty aıaqtaımyz dep senemin, – dedi Memleket basshysy.

Aıta keteıik, ótken aptadaǵy Úkimet otyrysynda Memleket basshysy Qasym-Jomart Toqaevtyń Qazaqstan halqyna Joldaýyn júzege asyrý jónindegi Jalpyulttyq is-sharalar jospary maquldandy. 

Premer-mınıstrdiń orynbasary – Ulttyq ekonomıka mınıstri Serik Jumanǵarınniń aıtýynsha, Prezıdenttiń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýyn iske asyrý jónindegi jalpyulttyq is-sharalar jospary mynandaı 8 baǵyt boıynsha 87 is-sharadan turady:

1. ınvestıtsııalyq saıasat jáne qarjy sektoryn damytý;
2. ónerkásiptik negizdi nyǵaıtý;
3. aýyl sharýashylyǵyn damytýdyń jańa serpini;
4. kólik-logıstıkalyq jáne týrıstik áleýetti iske asyrý;
5. TKSh jáne sý ınfraqurylymyn jańǵyrtý;
6. kásipkerlik ekonomıkany damytýdyń qozǵaýshy kúshi;
7. adamı kapıtaldy damytý;
8. parlamenttik reforma júrgizý.

- Usynylǵan jalpyulttyq jospar jobasynyń is-sharalary ulttyq ekonomıkanyń ornyqtylyǵyn arttyrýǵa, ekonomıkanyń negizgi salalaryn tsıfrlyq jáne memlekettik basqarýdy jańǵyrtýǵa, ınvestıtsııalyq ahýaldy jaqsartýǵa jáne azamattardyń jaǵdaıyn arttyrýǵa baǵyttalǵan, - dedi Serik Jumanǵarın.

Jalpyulttyq is-sharalar josparyna sáıkes, tsıfrlyq aktıvterdiń tolyqqandy ekojúıesin qalyptastyrýdy jedeldetý úshin Ulttyq bankpen birlesip, Memlekettik tsıfrlyq aktıvter qory qurylady. Geologııalyq derekterdi tolyq qamtý úshin jasandy ıntellekti qoldaný arqyly Big Data aqparattyq júıesin qurý qolǵa alynady. Investorlardyń quqyqtaryn qorǵaý maqsatynda Bas prokýratýranyń Aktıvterdi qaıtarý komıteti Investorlardyń quqyqtaryn qorǵaý komıteti retinde qaıta qurylady. «Bankter týraly» zań qabyldanady. 2026 jyly Ulttyq áýe júk tasymaldaýshy kompanııasy iske qosylady. 

Turǵyn úı-kommýnaldyq sharýashylyq (TKSh) júıesin reformalaý tsıfrlyq sheshimderdi belsendi engizý, onyń ishinde energııa tıimdiligin arttyrý arqyly iske asyrylady.

Premer-Mınıstr Oljas Bektenovtiń atap ótýinshe, jappaı tsıfrlyq transformatsııa, ekonomıkany jańǵyrtý jáne adam kapıtalyn nyǵaıtý arqyly elimizdiń ornyqty damýyn qamtamasyz etý qajet. 

Foto: primeminister.kz

- Memleket basshysynyń Joldaýyn iske asyrý jónindegi jalpyulttyq is-sharalar jospary alǵa qoıylǵan mindetterge saı keledi. Memlekettik organdardyń birinshi basshylary jospardaǵy is-sharalardyń sapaly ári ýaqytyly oryndalýyn qamtamasyz etýge tıis. Barlyq qarjylandyrý máselesin shuǵyl sheshý qajet, - dedi Oljas Bektenov.

Sonymen qatar Úkimet otyrysynda Premer-mınıstrdiń birinshi orynbasary Roman Sklıar óńirlerdiń jylytý maýsymyna daıyndyǵyna qatysty esep berdi. Onyń dereginshe, birqatar óńir jylytý maýsymyna daıyndyq jumystaryn áli tolyq aıaqtamaǵan. Osyǵan oraı, Oljas Bektenov Aqmola, Batys Qazaqstan, Abaı jáne Ulytaý oblystarynyń ákimderine jóndeý jumystarynyń aıaqtalýyn qatań baqylaýǵa alýdy tapsyrdy.

- Kelesi otyrysqa deıin aıaqtańyzdar. Jumystyń sapasy basty nazarda bolýǵa tıis. Tapsyrma oryndalmasa, tıisti sheshimder qabyldanady. Bul – barlyq óńirge qatysty másele. Jylý berý maýsymyn ýaqytyly bastaý qajet. Aǵymdaǵy ahýaldy kelesi Úkimet otyrysynda qaraıtyn bolamyz, - dep eskertti Premer-mınıstr.

Munan bólek, otyrysta jol qozǵalysy men jaıaý júrginshilerdiń qaýipsizdigin qamtamasyz etý máselesin pysyqtaldy. Baıandama jasaǵan Іshki ister mınıstriniń orynbasary Igor Lepehanyń dereginshe, jyl basynan beri qaıǵyly saldarǵa ákelýi múmkin jol erejesin buzý derekteri 20%-ǵa, qarsy qozǵalys jolaǵyna shyǵý faktileri 16%-ǵa artqan. Sondaı-aq mas kúıinde kólik júrgizgen 16,6 myń júrgizýshi ustalǵan.

Sondaı-aq 2016 jyly polıtsııa ókilderi memlekettik jáne jumys komıssııalary quramynan shyǵarylǵanyn, osydan keıin jol qozǵalysyn uıymdastyrýda jobalyq qatelikter jıi kete bastaǵanyn aıtty. 

– Sonyń saldarynan joldarda keptelis kóbeıip, jol-kólik oqıǵalarynyń sany artty. Oǵan qosa, turǵyn úı keshenderi men saýda-oıyn-saýyq ortalyqtaryn salǵanda qajetti avtoturaq oryndary qarastyrylmaıdy. Biz polıtsııany joldardy qabyldaý komıssııalarynyń quramyna qaıta qosýdy usynamyz. Qazir qurylysshylar bizdiń qabyldaý kezinde qatyspaıtynymyzdy biledi, sondyqtan jobanyń ózindik qunyn tómendetý maqsatynda qaýipsizdik máselelerin elemeıdi, – dedi Igor Lepeha.

Foto: Kólik mınıstrligi

Talqylanǵan máseleni qorytyndylaǵan Premer-Mınıstr Oljas Bektenov ortalyq jáne jergilikti atqarýshy organdarǵa birqatar mynadaı naqty tapsyrma berdi:

• Kólik mınıstrligi ákimdiktermen birlesip, avtomobıl joldaryn salý, kúrdeli jóndeý jáne kútip-ustaý kezinde jol qaýipsizdigin qamtamasyz etý jumystaryn kúsheıtýi;
• qurylys jáne jóndeý jumystary barysynda standarttardyń qatań saqtalýyna baqylaýdy qamtamasyz etýi;
• barlyq qaýipti jol ýchaskelerine tekserý júrgizip, sharalar qoldanýy;
• óńir ákimdikteri kúre joldardyń mańynda mal jaıý máselesi boıynsha tórt túlik ıelerimen túsindirý jumystaryn qamtamasyz etýi;
• Tsıfrlandyrý mınıstrligi joldardy mobıldi baılanyspen qamtý qarqynyn jedeldetýi;
• óńir ákimdikteri Іshki ister mınıstrligimen birlesip, eldi mekenderde jol erejesin buzý faktilerin tirkeıtin kameralar sanyn arttyrýy;
• respýblıkalyq mańyzy bar joldarda apparattyq-baǵdarlamalyq keshenderdi, pılotsyz ushý apparattaryn belsendi paıdalanýy;
• elektr mopedteri men samokattardy paıdalaný barysyna baqylaýdy kúsheıtýi qajet.