Úkimet Biryńǵaı memlekettik alıment qoryn qurý bastamasyn qoldamady

ASTANA. KAZINFORM – Úkimet Biryńǵaı memlekettik alıment qoryn qurý ıdeıasyn qoldamady. Bul týraly QR Premer-mınıstri Oljas Bektenov depýtattyq saýalǵa bergen jaýabynda málimdedi.

Sondaı-aq, qujatta Premer-Mınıstr memlekettiń kámeletke tolmaǵan balalardyń quqyqtaryn saqtaý jáne qorǵaý, onyń ishinde áleýmettik kómek alý boıynsha sharalar qabyldap jatqanyn túsindirdi. Bul rette balalarǵa qamqorlyq jasaý jáne olardy tárbıeleý ata-analardyń tabıǵı quqyǵy men mindeti bolyp sanalady (QR Konstıtýtsııasynyń 27-baby).

«Budan basqa, qor qurý boryshkerler sanynyń ósýine, nekeni buzýdyń jasandy túrde ulǵaıýyna, ata-ana mindettemelerin oryndaýdan jaltarýǵa ákelýi múmkin, bul rette qor aldyndaǵy bereshekti óteý de daýly bolyp qala beredi», - dep tolyqtyrdy Oljas Bektenov depýtattyq saýalǵa bergen jaýabynda.

Úkimet basshysy sheteldik tájirıbeni taldaý arqyly mundaı qurylymdy qurý memlekettik bıýdjetten qosymsha qarajat bólýdi, ıaǵnı qordy basqarý jónindegi arnaıy qurylym jasaýdy, qosymsha shtat ashýdy talap etetinin kórsetkenin jetkizdi.

«Joǵaryda aıtylǵandardy eskere otyryp, atqarýshylyq is júrgizý sheńberinde alıment óndirýdiń qoldanystaǵy tetikterin kúsheıtý qajet dep sanaımyz», - dep qorytyndylady Oljas Bektenov.