Úkimet bos bıýdjet qarajatyn bankterde ýaqytsha ornalastyrý qaǵıdasyn bekitti

ASTANA. KAZINFORM – Úkimet 2025 jylǵy 8 tamyzdaǵy №603 qaýlymen biryńǵaı qazynashylyq shottan ýaqytsha bos bıýdjet qarjysyn ornalastyrý qaǵıdasyna ózgerister engizdi. 

Jańa qaǵıda memlekettik qazynashylyqtyń ýaqytsha bos bıýdjet qarajatyn biryńǵaı qazynashylyq shottan depozıtte, ıaǵnı Ulttyq bank, ulttyq poshta operatorynda nemese ekinshi deńgeıdegi bankterde ornalastyrýdy uıymdastyrý jáne júzege asyrý tártibin aıqyndaıdy.

Ýaqytsha bos bıýdjet qarajaty bankterde mynadaı sharttarmen ornalastyrylady:

- ýaqytsha saqtaý teńge túrinde; 

- ýaqytsha bos bıýdjet qarajatyn ornalastyrý merzimi 12 aıǵa deıin, biraq aǵymdaǵy qarjy jylynyń aıaqtalý merziminen aspaý kerek; 

- syıaqy túrindegi kiris tólemi aı saıyn júrgiziledi, al bir aıǵa deıingi merzimge ornalastyrylǵan qarajat boıynsha ornalastyrý merzimi aıaqtalǵan soń tólenedi.

- Ornalastyrýdan túsken syıaqy túrindegi kiris respýblıkalyq bıýdjetke aýdarylady jáne salyq salynbaıdy,- delingen qujatta. 

Jańa qaǵıdamen tolyǵyraq myna silteme arqyly tanysýǵa bolady.

Eske sala ketsek, Joǵary aýdıtorlyq palatanyń tapsyrmasy boıynsha memlekettik baǵaly qaǵazdardyń shyǵarylýyn retteýdi jetildirýdiń jańa sharalary qabyldandy.