Úkimet byltyr bıýdjettiń shyǵys bóligin 13 ret ózgertken

ASTANA. KAZINFORM — Joǵary aýdıtorlyq palata múshesi Nurlan Nurjanov Májiliste 2024 jylǵy respýblıkalyq bıýdjet shyǵysynyń teń jartysy Ulttyq qor men qaryz esebinen jabylǵanyn málim etti.

— Respýblıkalyq bıýdjettiń shyǵystary 2024 jyly naqtylaýdy qosqanda jalpy 13 ret ózgeriske ushyraǵan. Bul sońǵy bes jyldaǵy rekordtyq kórsetkish bolyp otyr. Ózgeristerdiń shamamen 40 paıyzy tórtinshi toqsanda engizilip, saldarynan respýblıkalyq bıýdjettiń shyǵys bóliginiń 6,2 trln teńgesi qaıa qaraldy. Mundaı jıi engiziletin ózgerister bıýdjetti josparlaýdyń boljamdylyǵyna nuqsan keltiredi. Sondaı-aq, qysqa merzimdi sheshimderge basa nazar aýdarýǵa baǵyttalǵanyn kórsetedi, — dedi ol Májilistiń otyrysynda.

Sondaı-aq, ol byltyr Ulttyq qor asqan ysyrapshyldyqpen paıdalanylǵanyn atap ótti.

— Shyǵystardy qarjylandyrýǵa munaıǵa qatysty emes kiristerdiń úlesi 2024 jyly 46 paıyzǵa deıin tómendegen. ıAǵnı, respýblıkalyq bıýdjet shyǵystarynyń jartysyna jýyǵy Ulttyq qordan beriletin transfertter men alynatyn qaryzdar esebinen jabylyp otyr, — dedi Nurlan Nurjanov.

Eske salsaq, ótken aptada EAEO men Iran arasyndaǵy erkin saýda týraly kelisim kúshine engen bolatyn.