Úkimet beıitke arnalǵan jer telimin satqandarǵa aıyppul salmaqshy

ASTANA. KAZINFORM — Premer-mınıstr Oljas Bektenov Senat depýtatynyń saýalyna bergen jaýabynda marqumdy jerleýmen baılanysty qyzmetterdiń baǵasyn memleket retteı almaıtynyn málim etti. 

Depýtat saýalynda adam beıitke arnalǵan jerdi zańsyz beretinderge jaza taǵaıyndaý kerektigi aıtylǵan bolatyn.

— Úkimet beıitke arnalǵan jer telimin zańsyz berip satqany úshin ákimshilik jaýapkershilik engizý máselesin pysyqtaıdy. Onyń ishinde zańnamalyq aktilerge túzetý engizý múmkindikteri de qarastyrylady, — dep jazylǵan Úkimet basshysynyń jaýabynda.

Sondaı-aq, Premer-mınıstr ár marqumǵa 6 sharshy metr jer memleketten tegin beriletini aıtylǵan.

— Jer kodeksi 109-babynyń 3-tarmaǵy boıynsha beıitke arnap jalpy qoldanysqa alynǵan jer qorynan belgili bir mekende qaıtys bolǵan turǵyndy nemese naqty turatyn orny joq marqumdy jerleý úshin 6 sharshy metrden kem bolmaıtyn telim tegin beriledi, — dep jazady Oljas Bektenov.

Jaýapta dinı joralǵylarmen baılanysty qyzmetter áleýmettik mańyzy bar taýarlar men qyzmetterdiń sanatyna kirmeıtindikten onyń baǵasyn memleket rettemeıtini aıtylǵan.

— Bul naryqta lıtsenzııalaý tetigi joq bolǵandyqtan qyzmet ákimshileri beıit aýmaǵynda kórsetiletin qyzmetterdiń baǵasyn ózderi belgileıdi, — delingen jaýapta.

Beıitke arnalǵan bos telimderdi anyqtaý úshin Jarııa kadastrlyq kartanyń qyzmetine júginýge bolady.

— Jyljymaıtyn múlikpen, jermen baılanysty mámlelerdi jasaý úshin Jyljymaıtyn múliktiń biryńǵaı memlekettik kadastrynan (https://map.gov4c.kz/egkn/ — red.) bos jáne ıesi bar telimderdi onlaın rejımde kórýge bolady, — dep jazylǵan Premer-mınıstrdiń jaýabynda.

Aıta ketelik Almatyda jerleý qyzmeti qansha turatynyn jazǵan edik.