Úkimet Baıqońyr túbindegi aerodromdy Qazaqstan menshigine alýdan bas tartty
ASTANA. KAZINFORM — Senat depýtattary Premer-mınıstrdiń atyna saýal joldap, Baıqońyr túbinde 1980 jyly salynǵan «ıÝbıleınyı» aerodromyn Qazaqstannyń kommýnaldyq menshigine alyp, nysannyń bazasynda avıa otyn quıatyn keshen qurýdy usynǵan bolatyn. Oljas Bektenov osy saýalǵa jaýap berdi.
Depýtattar keltirgen málimetke sensek, aerodromdaǵy ushý-qoný jolaǵynyń uzyndyǵy — 4,5 shaqyrym, eni — 84 metr, beton monolıtten quıylǵan jabynnyń qalyńdyǵy – 32 santımetr.
— Kezinde aerodrom salmaǵy 392 tonnaǵa deıin baratyn ushaqty qabyldaýǵa jaramdy boldy. Alaıda, 2020 jyly Reseı Federatsııasynyń eksperımenttik avıatsııasy aerodromdardyń memlekettik tiziliminen «ıÝbıleınyı» aerodromyn shyǵaryp, jumysy toqtady. Osylaısha, qazirgi ýaqytta aerodromnyń mártebesi men menshik ıesi anyqtalmaǵan, — dep jazady senatorlar.
Premer-mınıstr atalǵan nysannyń 1994 jyldyń jeltoqsanynan beri Reseı Federatsııasyna jalǵa berilgen «Baıqońyr» kesheniniń múlki bolyp esepteletinin aıtqan.
— Onyń tolyqqandy jumys isteýi úshin Halyqaralyq azamattyq avıatsııa uıymynyń standarttaryna saı keletin mynadaı elementterdiń bolýy qajet: áýeaılaq ınfraqurylymy, aerovokzal kesheni, ushýdy qamtamasyz etý quraldary, avarııalyq-qutqarý qyzmeti, avıatsııalyq qaýipsizdik qyzmeti, jerústi jáne áýeaılaqqa qyzmet kórsetý, arnaıy tehnıka parkiniń bolýy. Bul rette ınfraqurylymnyń jaı-kúıi qanaǵattanarlyqsyz dep baǵalanady. Ushý-qoný jolaǵynyń beton jabyny jarylyp, qurylys jaılar tozǵan, arnaıy tehnıkalary joq. Al áýeaılaqtyń ózi ushý qaýipsizdigin qamtamasyz etý úshin halyqaralyq talaptarǵa sáıkes kelmeıdi. Osyǵan baılanysty áýejaıdyń qyzmetin qalpyna keltirý úshin ınfraqurylymdyq obektilerdi qalpyna keltirý, arnaıy tehnıka parkin jańartý jáne personaldy jınaý qajet bolady, bul óz kezeginde qomaqty qarjy salymdaryn talap etedi, — dep jazylǵan jaýapta.
Úkimet basshysy Baıqońyr qalasyna jaqyn jerde oblystyq mańyzdaǵy Qyzylorda áýejaıy turǵandyqtan ıÝbıleınyı aerodromyn qaıta jandandyrý sonshalyqty tıimdi qadam bolmaıtynyn aıtady. Oljas Bektenov aılaqty janarmaı quıý kesheni retinde paıdalanýdyń reti joq dep sanaıdy. Óıtkeni, avıa otynnyń ımporty jyldan jylǵa artyp keledi. Jaýapta keltirilgen derekke súıensek, 2023 jyly eldegi munaı óńdeıtin zaýyttar 637 myń tonna avıa otyn óndirse, tutyný kólemi 832 myń tonna bolǵan. Al byltyrǵy 11 aıda 522 myń tonna óndirilip, 794 myń tonna tutynylǵan.
— Osyǵan baılanysty jáne elimizdiń iri áýejaılaryndaǵy janarmaı quıý keshenderinde jańǵyrtý jumystary júrgizilip jatqanyn eskersek, áýeaılaqty avıa otyn quıýǵa arnalǵan zamanaýı stantsııalarmen jaraqtandyrý orynsyz dep sanaımyz. Áýeaılaqtyń qanaǵattanarlyqsyz jaı-kúıin jáne jolaýshylar aǵynynyń az bolýyn, Baıqońyr qalasynda eksporttyq taýarlar óndirisiniń bolmaýyn nazarǵa ala otyryp, qazirgi ýaqytta ony mýltımodaldy avıahab retinde paıdalaný tıimsiz dep paıymdaımyz, — dep jazady Premer-mınıstr.
Eske salsaq, byltyr jazǵa qaraı Reseı «Baıqońyr» keshenindegi 234 nysandy Qazaqstanǵa qaıtarýǵa nıetti ekeni málim bolǵan edi.