Úkimet basshysy zań jobalarynyń sapaly ázirleýin baqylaýda ustaýdy tapsyrdy
ASTANA. KAZINFORM — Zań jobalaryn kelisý barysynda basy artyq bıýrokratııadan arylý qajet. Bul týraly búgin Úkimet otyrysynda Premer-mınıstr Oljas Bektenov aıtty.
- Kelesi jyly barlyǵy 12 zań jobasyn ázirleý kózdelgen. Osyǵan baılanysty myna máselelerge nazar aýdarý qajet. Memlekettik organdardyń birinshi basshylary árbir zań jobasynyń sapaly ázirlenýin jáne olardyń Májiliske ýaqtyly engizilýin qatań baqylaýda ustasyn, - dedi Úkimet basshysy.
Premer-mınıstr memlekettik organdardyń arasynda vedomstvoaralyq úılestirýdi qamtamasyz etý mańyzdy ekenin atap ótti. Zań jobalaryn kelisý barysynda basy artyq bıýrokratııadan arylyp, jedel jumys isteý kerektigine nazar aýdartty.
- Ádilet mınıstrligi Memleket basshysynyń, Prezıdent Ákimshiliginiń jáne Úkimettiń zańnamalyq tapsyrmalaryna jyl boıy monıtorıng júrgizip otyrýǵa tıis. Olardyń belgilengen tártippen josparly nemese bastamashylyq jasalǵan zań jobalaryna engizilýin qamtamasyz etý qajet, - dedi Oljas Bektenov.
Osydan keıin Premer-mınıstr Úkimettiń zań jobalaý jumystarynyń 2026 jylǵa arnalǵan josparynyń jobasyn maquldaýdy usynyp, ol qoldaý tapty.
- Jospardyń oryndalýyn jalpy baqylaý men úılestirý Ádilet mınıstrligine júkteledi, - dedi Úkimet basshysy.
Buǵan deıin Úkimettiń bıylǵy zań jobalaý jospary oryndalǵanyn jazǵan edik.