Úkimet basshysy Týrızmdi damytý tujyrymdamasyn túzetýdi mindettedi
ASTANA. KAZINFORM – Týrızm salasynda kadrlyq máselelerdi sheshý úshin qosymsha sharalar qabyldaý qajet. Bul týraly búgin Úkimet otyrysynda Premer-mınıstr Oljas Bektenov aıtty.
- Prezıdent atap ótkendeı, týrızm salasy ekonomıkanyń birneshe sektoryn qamtıdy. Sondyqtan barlyq tıisti memlekettik organdar men ákimdikterdiń jumysyn úılestirý qajet. Bul rette ár óńirde týrızmdi damytý baǵdarlamalary bar. Týrızm jáne sport mınıstrligi óńir ákimdikterimen birge bir aı merzimde naqty is-sharalar josparyn engize otyryp, 2029 jylǵa deıingi Týrızmdi damytý tujyrymdamasyn tolyqtyryp, túzetýi qajet. Sonymen qatar Ǵylym jáne joǵary bilim mınıstrligimen birlesip, týrızm salasynda kadrlyq máselelerdi sheshý úshin qosymsha sharalar qabyldasyn, - dedi Oljas Bektenov.
Aıta keteıik, keshe «Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.
Suhbat barysynda Prezıdent týrızm salasyndaǵy kadr tapshylyǵy óte ózekti másele ekenin aıtty.
- Sondyqtan Túrkistanda Halyqaralyq týrızm jáne meımandostyq ýnıversıteti ashyldy. 2024 jyly oqý ordasynyń alǵashqy túlekteri dıplomdaryn alyp, eńbek naryǵyna qosyldy. Alaıda bul jetkiliksiz, - dedi Memleket basshysy.
