Úkimet basshysy tsıfrlyq teńgege qatysty negizgi mindetti atady
ASTANA. KAZINFORM — Qarjy salasyn tsıfrlyq transformatsııalaýǵa erekshe nazar aýdarý qajet. Bul týraly Úkimet otyrysynda Premer-mınıstr Oljas Bektenov málim etti.
- Bıýdjettik josparlaý, qazynashylyq atqarý, memlekettik aktıvterdi basqarý jáne aýdıt – barlyǵy biryńǵaı tsıfrlyq júıege qosylýǵa tıis. Zań buzý derekterin anyqtalǵannan keıin ǵana tirkemeı, olardyń aldyn alýǵa kóshý kerek. Al bıýdjet qarajaty men memlekettik aktıvterge qatysty sheshimder boljamdy taldaý negizinde qabyldanýy kerek, - dedi O.Bektenov.
Onyń aıtýynsha, tsıfrlyq teńge osy júıedegi quraldardyń birine aınalyp, bıýdjet qarajatynyń tolyq qadaǵalanýyn jáne smart-kelisimsharttardy qoldanýdy qamtamasyz etýi qajet.
- Túptep kelgende, biz tólem jasalǵannan keıingi baqylaýdan tikeleı tólem sátindegi baqylaýǵa kóshýge tıispiz. Azamattar men bıznes úshin salyq salasyndaǵy ákimshilendirý barynsha baıqalmaıtyn ári servıstik sıpatqa ıe bolýy kerek. Memlekette qazirdiń ózinde derekterdiń edáýir kólemi bar, sondyqtan salyqtar avtomatty túrde eseptelip, eseptilikti aldyn ala toltyrý qajet. Baqylaý adal jumys isteıtin bızneske emes, eń aldymen, naqty táýekelderge baǵyttalýǵa tıis. Qarjy mınıstrligi eki aı merzimde memlekettik derekter men táýekelderdi baǵalaý modelderi negizinde avtomatty túrde sheshim qabyldaýǵa bolatyn basym bıýdjettik, salyq jáne baqylaý protsesterin aıqyndap, olardy naqty iske asyrýǵa kirissin, - dedi Úkimet basshysy.
Aıta keteıik, 2029 jylǵa qaraı IT-eksportty keminde 2 mlrd AQSh dollaryna jetkizý josparlanǵan.
