Úkimet basshysy: Sý tasqynynan zardap shekkenderdiń eshqaısysy nazardan tys qalmaıdy
Bektenov qarǵyn sý jaıynda: Qatelikterden sabaq alyp, jumysty tıimdi uıymdastyrý qajetASTANA. KAZINFORM – Úkimet otyrysynda Premer-Mınıstr Oljas Bektenov 2025-2029 jyldarǵa arnalǵan sý tasqynynyń aldyn alý josparyn ázirleýdi tapsyrdy.
«Tótenshe jaǵdaılar mınıstrligi Qorǵanys, Іshki ister mınıstrlikterimen jáne ákimdiktermen birlesip, adamdardyń qaýipsizdigin qamtamasyz etý jóninde qajetti sharalar qabyldasyn. Qazirgi jaǵdaıda eń mańyzdysy – azamattarymyzdyń ómiri. Qajet bolǵan jerde evakýatsııalaý jumystaryn aldyn ala júrgizý kerek», - dedi Úkimet basshysy.
Oljas Bektenov sonymen qatar Tótenshe jaǵdaılar mınıstrligine ákimdiktermen jáne basqa da kúshtik qurylymdarmen birlesip, sý basqan eldi-mekenderde avarııalyq-qutqarý jáne kezek kúttirmes shuǵyl jumystardy júrgizý úshin kúshter men quraldardyń jetkilikti kólemin qamtamasyz etýdi tapsyrdy.
«Ákimdikter Aqtóbe, Batys Qazaqstan jáne Qostanaı oblystarynda bolǵan sý tasqynyna nazar aýdara otyryp, elimizdiń soltústik, shyǵys jáne ortalyq óńirlerinde sý basyp ketpeýi úshin naqty sharalar qabyldasyn. Qatelikterden sabaq alyp, jumysty jańadan tıimdi etip uıymdastyrý qajet. Bul rette, júrgizilip jatqan is-sharalar týraly halyqty der kezinde habardar etip otyrý mańyzdy. Aýqymdy sý tasqynyna alyp kelgen sebepterdi anyqtap, olardy joıý jóninde usynystarmen birge qalyptasqan jaǵdaıǵa tolyq taldaý júrgizý qajet. Árbir óńir geografııalyq jáne aýa raıynyń erekshelikterin eskere otyryp, is-sharalar josparyn qaıta qaraýy kerek. Osyǵan baılanysty Tótenshe jaǵdaılar mınıstrligine múddeli memlekettik organdarmen jáne ákimdiktermen birlesip, 2025-2029 jyldarǵa arnalǵan sý tasqynynyń aldyn alý josparyn ázirleýdi tapsyramyn. Bul jumysqa tájirıbeli salalyq sarapshylardy tartý kerek», - dedi ol.
Premer-Mınıstr Tótenshe jaǵdaılar, Ulttyq ekonomıka, Qarjy, Kólik, Qurylys, Sý resýrstary mınıstrlikteri men óńir ákimdikteri tez arada apattan kelgen shyǵyn kólemin baǵalap, zardap shekken adamdarǵa materıaldyq kómek kórsetýge kirisýi tıistigin basa aıtty.
«Ákimdikter jergilikti jerlerde zardap shekken turǵyndardy shyǵyndy óteý algorıtmi jáne úı salý úshin kórsetiletin kómek týraly ataýly túrde habardar etýge tıis. Zardap shekkenderdiń eshqaısysy nazardan tys qalmaıdy. Bárine kómek beriletin bolady», - dedi Oljas Bektenov.
