Úkimet basshysy Shyǵys Qazaqstan oblysy aktıvine jańa ákimdi tanystyrdy
ASTANA. KAZINFORM — Oljas Bektenov Prezıdenttiń tapsyrmasy boıynsha Shyǵys Qazaqstan oblysy aktıvine jańa ákimdi tanystyrdy, dep habarlaıdy Úkimettiń baspasóz qyzmeti.
Memleket basshysynyń tapsyrmasy boıynsha Premer-mınıstr Oljas Bektenov pen Prezıdent Ákimshiliginiń basshysy Aıbek Dádebaı Shyǵys Qazaqstan oblysy máslıhattary depýtattarynyń jınalysyna qatysty.
Jınalys barysynda depýtattarǵa Memleket basshysynyń Shyǵys Qazaqstan oblysynyń ákimi laýazymyna eki kandıdat — ShQO ákiminiń birinshi orynbasary Nurymbet Saqtaǵanov pen ShQO Ulan aýdanynyń ákimi Arman Bekbosynovty usyný týraly haty oqyldy.
Ashyq daýys berý nátıjesi boıynsha depýtattar Nurymbet Saqtaǵanovtyń kandıdatýrasyn qoldady, oǵan 148 depýtattyń 104-i daýys berdi, Arman Bekbosynovty 41 depýtat jaqtady.
Memleket basshysy Shyǵys Qazaqstan oblysynyń ákimi Nurymbet Amanuly Saqtaǵanovty taǵaıyndaý týraly Jarlyqqa qol qoıdy.
Oblys aktıvimen kezdesýde Oljas Bektenov Ermek Kósherbaevqa nátıjeli jumysy men óńirdiń damýyna qosqan úlesi úshin alǵys bildirdi. Sońǵy jyldary Shyǵys Qazaqstan oblysyna shamamen 1,5 trln teńge ınvestıtsııa tartylǵany atap ótildi. Bul jańa jumys oryndaryn ashýǵa, ekonomıkalyq ósimdi qamtamasyz etýge múmkindik berdi. Oblysta ınfraquqrylymdyq jáne áleýmettik jańa nysandar iske qosyldy.
Jańa ákimdi tanystyrǵan Premer-mınıstr Memleket basshysynyń Shyǵys Qazaqstan oblysy basshylyǵy aldyna qoıǵan mindetterge toqtaldy. Іske asyrý halyqty jumyspen qamtamasyz etip, óńir ekonomıkasynyń damýyna serpin beretin perspektıvaly baǵyttar aıqyndaldy. Basym jobalar qataryna shaǵyn jáne orta bıznesti qoldaý, aýyl sharýashylyǵy ónimderin qaıta óńdeý, tsıfrlyq sheshimderdi engizý jatady. Halyqty sapaly aýyz sýmen qamtamasyz etý, ınjenerlik ınfraqurylymdy jańǵyrtý jumystaryn kúsheıtýdiń mańyzdylyǵy atap ótildi.
Tabıǵı demalys aımaqtary men tarıhı-mádenı oryndardy damytý arqyly týrıstik áleýetti ashýǵa erekshe nazar aýdaryldy. Buqtyrma sý qoımasy arqyly elimizdegi eń iri kópirdiń ashylýy, Qatonqaraǵaı jáne Zaısan kýrorttyq aımaqtarynda áýejaılardyń salynýy sala men jalpy ekonomıkanyń damýyna qosymsha serpin beredi.
Basym mindetter qatarynda arnaıy ekonomıkalyq jáne ındýstrııalyq aımaqtardy ınjenerlik ınfraqurylymmen qamtamasyz ete otyryp, ınvestorlar úshin qolaıly jaǵdaı jasaý, ónerkásipte zamanaýı tehnologııalar men ınnovatsııalyq tásilder qoldaný jáne basqa da máseleler belgilengen.
Buǵan deıin Memleket basshysynyń Jarlyǵymen Nurymbet Amanuly Saqtaǵanov Shyǵys Qazaqstan oblysynyń ákimi laýazymyna taǵaıyndalǵanyn jazǵan edik.