Úkimet basshysy: Shaǵyn bıznes úshin salyq eseptiligin avtomatty túrde toltyrýdy qamtamasyz etý qajet
ASTANA. KAZINFORM — 2026 jyldyń qańtarynan óńdeý ónerkásibinde óndiristik qýattardy jańǵyrtý úshin lızıngtik qarjylandyrýdy iske qosý qajet. Bul týraly búgin Úkimet otyrysynda Premer-mınıstr Oljas Bektenov aıtty.
— Óńdeýshi sektordyń jalpy ishki ónimdegi úlesin odan ári ulǵaıtý úshin kásiporyndardyń óndiristik qýatyn arttyryp, olardy jańǵyrtý jumystaryn yntalandyrý kerek. Ony shaǵyn jáne orta bıznes óndiristerin qaıta jabdyqtaý esebinen de iske asyrǵan jón. Ónerkásip mınıstrligine kelesi jyldyń qańtar aıynan bastap, óńdeý ónerkásibinde óndiristik qýattardy jańǵyrtý úshin lızıngtik qarjylandyrýdy iske qosýdy tapsyramyn. Mıkro jáne shaǵyn bıznes kepildiksiz 300 mıllıon teńgege deıin óz óndiristerin jańǵyrtý múmkindigine ıe bolady. Óndiristi qaıta jabdyqtaý kásiporyndardyń ónimdiligin ulǵaıtyp, básekege qabilettiligin arttyrýǵa yqpal etedi, — dedi Premer-mınıstr.
Onyń aıtýynsha, bıznesti ońaılatylǵan deklaratsııa rejımin qoldanatyn jetkizýshilermen jumys kezinde shyǵystardy shegerýge tyıym salý máselesi alańdatyp otyr. Bul — shamamen 400 myń shaǵyn jáne mıkrobıznes ókiliniń múddesine qatysty.
— Atalǵan sanattaǵy kásipkerler óz kásibiniń bolashaǵyna alańdamaýǵa tıis. Qarjy mınıstrligi salyqtyq ákimshilendirýdiń servıstik modelin engizip, tıisti túsindirý jumystaryn júrgizý arqyly olardy qoldap otyrýy qajet. Sonymen qatar Ulttyq bankpen birlesip, shaǵyn bıznes úshin salyq eseptiligin avtomatty túrde toltyrýdy jedel qamtamasyz etsin. Ulttyq ekonomıka mınıstrligi múddeli memlekettik organdarmen birlesip, jalpyǵa birdeı belgilengen salyq salý rejıminde jumys isteıtin shaǵyn jáne orta bıznesti qoldaýdyń qosymsha salyqtyq emes sharalaryn ázirlesin. Tıimdi tetikterdiń biri — «Órleý» baǵdarlamasy aıasynda qarjylandyrý krıterıılerin keńeıtý, — dedi Oljas Bektenov.
Aıta keteıik, Úkimet «Іsker aımaq» biryńǵaı baǵdarlamasyn bekitti.