Úkimet basshysy satyp alý rásimderindegi kedergilerdi joıýdy tapsyrdy
ASTANA. KAZINFORM – Otandyq óndirýshilermen jasalatyn sharttardyń kólemin ulǵaıtýdy qamtamasyz etý qajet. Bul týraly Úkimet otyrysynda Premer-mınıstr Oljas Bektenov aıtty.
- Ónerkásip mınıstrliginiń klasterlik damý modeline qatysty usynysyn qoldaımyz. Bul qolda bar qýattar men jergilikti óndirýshilerdiń áleýetin barynsha jumyldyryp, ekonomıkanyń ósýin qamtamasyz etýge múmkindik beredi. Qarjy mınıstrligimen jáne «Atameken» ulttyq palatasymen birlesip, jyl sońyna deıin satyp alý rásimderindegi kedergilerdi joıý boıynsha sharalar qabyldap, otandyq óndirýshilermen jasalatyn sharttardyń kólemin ulǵaıtýdy qamtamasyz etý qajet, - dedi Úkimet basshysy.
Premer-mınıstr Ónerkásip mınıstrligine múddeli memlekettik organdarmen birge kásiporyndardyń ótinishterin eskere otyryp, Qazaqstan taýar óndirýshiler tizilimin qysqa merzimde jetildirip, menshikti óndiristiń bar-joǵyn onlaın rejımde tekserýdi qamtamasyz etý úshin onyń memlekettik organdardyń derekqorlarymen yqpaldastyrý aıasyn keńeıtýdi tapsyrdy.
- «Halyqtyq qurylys» baǵdarlamasyn keń aýqymda júzege asyrý bastalyp jatyr. Ónerkásip mınıstrligi ákimdiktermen, «Báıterek» holdıngimen jáne «Atameken» ulttyq palatasymen birlesip, atalǵan baǵdarlamaǵa otandyq óndirýshilerdiń qatysýyn qamtamasyz etsin. Jobalardy qalyptastyrý kezinde taýar óndirýshiler tizilimindegi qolda bar ónimdi eskerý, taýarlarǵa qajettilikti aldyn ala jarııalaý jáne satyp alý men jetkizý merzimderin eskere otyryp, óndiris kólemin ulǵaıtýǵa qajetti qarjylandyrý tetikterin qamtamasyz etý kerek, - dedi Oljas Bektenov.
Aıta keteıik, elimizde álemdik brendterdiń júk kólikterin shyǵarý qolǵa alyndy.