Úkimet basshysy: Perızat Qaırat isi — zańnamalyq ózgerister úshin múmkindik
ASTANA. KAZINFORM — Úkimet basshysy Oljas Bektenov mıllıardtaǵan qarjyny jymqyrdy dep kúdikke ilingen qaıyrymdylyq qorynyń jetekshisi Perızat Qaırattyń isine qatysty pikir bildirdi.
Úkimet otyrysynan keıin ótken baspasóz máslıhatynda Premer-Mınıstr Oljas Bektenovke:
— Qazir Perızat Qaıratqa qatysty mıllıardtaǵan qarajattyń jymqyrylýyna baılanysty rezonansty is júrip jatyr. Osy oraıda qaıyrymdylyq qorlary men qarajat jınaýmen aınalysatyn uıymdarǵa qoıylatyn talaptar men olardyń jumysyna qandaı da bir ózgerister engizile me? — degen saýal qoıyldy.
— Iá, men bul jaǵdaıdan habarym bar. Ókinishke qaraı, ómir kórsetip otyrǵandaı, tek bıýdjet qarajaty ǵana emes, azamattardan qaıyrymdylyq retinde jınalǵan qarajat ta maqsatsyz jumsalyp jatyr. Bul keıs - sonyń aıqyn mysaly. Bul - jalǵyz oqıǵa emes, basqa da mysaldar bar. Biraq, bul isti eń rezonansty deýge bolady, — dep jaýap berdi Oljas Bektenov.
Úkimet basshysy qarjy mehanızmderin zańnamalyq turǵydan qaıta qaraý qajettigin atap ótti.
— Qarajattyń jumsalýy týraly esep baqylaýda ári ashyq bolýy kerek. Sondyqtan bul jerde, menińshe, Úkimet tarapynan da, quqyq qorǵaý organdarynyń negizinde de, urlyqtyń naqty qalaı júzege asqanyn anyqtaý kerek. Bul - tıisti zańnamalyq túzetýlerdi qabyldaýǵa múmkindik. Bolashaqta osy sekildi quqyqbuzýshylyqtardyń aldyn alýǵa baǵyttalady, — deıdi ol.
Aıta keteıik, búgingi sot otyrysynda «Asar-Úme» qorynyń prezıdenti Perızat Qaıratqa 200 mln teńge aýdarǵanyn aıtty. Perızat Qaırat qarajatqa Gaza sektory turǵyndaryna qajetti taýardyń satyp alynǵany jóninde esep berýi tıis bolǵan. Alaıda, qor prezıdentiniń aıtýynsha, ýáde etilgen esep berilmegen.
Keshegi sot otyrysynda belgili bolǵandaı, Biz birgemiz qorynyń quryltaıshylary qordy qurý týraly hattamaǵa qol qoımaǵan.
Sondaı-aq memlekettik aıyptaýshy Perızat Qaırat pen onyń anasyna taǵylǵan aıyptardy tizbektep shyqty.
Sýdıa suraǵyna jaýap bergen Perızat Qaırat aıyptar negizsiz taǵyldy dep, moıyndamaıtynyn jetkizdi.