Úkimet basshysy orfandyq preparattarǵa qatysty qarjylandyrý tizbesin aıqyndaýdy tapsyrdy
ASTANA. KAZINFORM – Densaýlyq saqtaý mınıstrligi halyqty dári-dármekpen qamtamasyz etý boıynsha aqparattyq jumysty kúsheıtýi qajet. Bul týraly Úkimet otyrysynda Premer-mınıstr Oljas Bektenov málim etti.
«Taǵy bir mańyzdy másele – sırek kezdesetin aýrýlary bar naýqastardy qymbat preparattarmen qamtamasyz etý týraly Memleket basshysynyń tapsyrmasyn oryndaý. Bul jumysty jaqsartý úshin Respýblıkalyq orfandyq aýrýlar ortalyǵy quryldy. Halyqaralyq tájirıbeni eskere otyryp, mundaı naýqastardy emdeý tásilderi qaıta qaralyp jatyr. Ózderińiz biletindeı, emhanalarda esepte turǵan azamattar úshin qymbat preparattardyń jetispeýine baılanysty kóptegen shaǵymdar kelip túsip otyr. Mınıstrlik mundaı patsıentterdi naqty baqylap, atalǵan dárilik zattarǵa degen qajettiligin tolyq kólemde qamtamasyz etýi qajet. Eshkim de kómeksiz qalmaýǵa tıis», - dedi O. Bektenov.
Úkimet basshysy Densaýlyq saqtaý mınıstrligine «Qazaqstan halqyna» qorymen birlesip, orfandyq preparattardy satyp alýdy qarjylandyrý tizbesi men kózderin aıqyndap alýdy tapsyrdy.
«Sonymen qatar «Áleýmettik ámııan» júıesi arqyly dárilik zattarǵa elektrondyq vaýcherler alý boıynsha jaqynda qoldanysqa engizilgen protsesti tezdetip aıaqtaý qajet. Bul tegin dári-dármek berý rásimderin qysqartady. Jalpy, Densaýlyq saqtaý mınıstrligi halyqty dári-dármekpen qamtamasyz etý boıynsha aqparattyq jumysty kúsheıtýi qajet. Jurtshylyq kimge jáne qandaı dári-dármekter tegin beriletinin naqty bilýge tıis. Memleket óz mindettemelerin oryndap otyr», - dedi Premer-Mınıstr.
Buǵan deıin habarlanǵandaı, Oljas Bektenov 2025 jylǵa arnalǵan dári-dármekti jetkizý rásimderin bıyldyń sońyna deıin aıaqtaýdy tapsyrdy.
