Úkimet basshysy óńirlerdi tsıfrlandyrý týraly: Ákimdikter jetkilikti kóńil bólmeıdi
ASTANA. KAZINFORM – Úkimet basshysy Oljas Bektenov óńirlerde tsıfrlyq ınfraqurylym tolyq qamtamasyz etilmegenin aıtty.
«Óńirlerde tsıfrlyq ınfraqurylym tolyq qamtamasyz etilmegen. Ákimdikter bul máselege jetkilikti kóńil bólmeı keledi. Óńirlik habtarǵa qarjylyq jáne ınfraqurylymdyq qoldaý kórsetý óte mańyzdy. Tsıfrlyq damý mınıstrlgine óńir ákimdikterimen birge Astana-habty damytý, óńirlik habtardy qoldaý jáne IT-salada eksportqa baǵdarlanǵan baǵyttardy damytý úshin qolaıly jaǵdaılar jasaý jóninde sharalar qabyldaýdy tapsyramyn», - dedi Oljas Bektenov Úkimet otyrysynda.
Odan ári Premer-mınıstr IT-salanyń joǵary bilikti mamandaryn daıarlaý máselesin kóterdi.
«Astana-habta úzdik halyqAralyq tájirıbe eskerilip, qajetti jaǵdaılar jasalǵan. Jańadan qurylatyn Jasandy ıntellekt ortalyǵy jas talanttardy tartý núktesine aınalýǵa tıis. Tsıfrlyq damý, Ǵylym jáne joǵary bilim, Oqý-aǵartý mınıstrlikterine Astana-habpen jáne óńirlik habtarmen ózara tyǵyz baılanysta otyryp, odan ári damý jáne oqytý tujyrymdamasyn jasaýdy tapsyramyn. Oqý bitirgen mamandardyń sanyn kóbeıtý maqsat emes, olardyń daıarlyq sapasyna basa nazar aýdarý qajet. Úzdik álemdik ádistemelerdi nazarda ustap, tsıfrlyq bilim men daǵdylardy arttyrý tásilderin únemi jańartyp turǵan jón», - deıdi ol.
Buǵan deıin habarlaǵanymyzdaı Qazaqstan jarty jylda 306 mln dollarǵa IT-qyzmetterdi eksporttady.
Sondaı-aq Úkimet otyrysynda qazaqstandyq IT-mamandardyń jalaqysy 54%-ǵa óskeni aıtyldy.