Úkimet basshysy Oljas Bektenov Ulytaý oblysynyń aktıvine jańa ákimdi tanystyrdy
ASTANA. KAZINFORM – Memleket basshysynyń tapsyrmasy boıynsha Premer-Mınıstr Oljas Bektenov pen Prezıdent Ákimshiliginiń basshysy Aıbek Dádebaı Ulytaý oblysy máslıhaty depýtattarynyń jınalysyna qatysty.
QR Prezıdenti Qasym-Jomart Toqaev depýtattardyń qaraýyna oblys ákimi laýazymyna Dastan Ryspekov pen Ulantaı Úsenovtiń kandıdatýralaryn usyndy. Ashyq daýys berý nátıjelerine sáıkes 64 depýtattyń 49-y Dastan Ryspekovtiń kandıdatýrasyn qoldady, 15 depýtat óz daýystaryn Ulantaı Úsenovke berdi. Daýys berý qorytyndysy boıynsha Memleket basshysy Dastan Adaıuly Ryspekovti Ulytaý oblysynyń ákimi laýazymyna taǵaıyndaý týraly Jarlyqqa qol qoıdy.
Premer-Mınıstr oblys aktıvimen kezdesýde Berik Ábdiǵalıulyna óńirdiń damýyna qosqan úlesi úshin alǵys aıtyp, jańa ákimdi tanystyrdy.
Oljas Bektenov Memleket basshysy Ulytaý oblysy basshylyǵynyń aldynda ekonomıkany ártaraptandyrý, jańa óndiris oryndaryn ashý, ınvestıtsııalyq ahýaldy jaqsartý, ınfraqurylymdy jańǵyrtý, sondaı-aq ekologııa máselelerin sheshý, kólik jáne týrıstik áleýetti barynsha damytý boıynsha mańyzdy mindetter qoıǵanyn atap ótti.
Eske sala keteıik, buǵan deıin Berik Ábdiǵalıulynyń Ulytaý oblysynyń ákimi laýazymynan bosatylǵanyn, Dastan Ryspekovtiń Ulytaý oblysynyń ákimi laýazymyna taǵaıyndalǵanyn habarlaǵan edik.
