Úkimet basshysy Oljas Bektenov Ózbekstanǵa jumys saparymen bardy
TAShKENT. KAZINFORM – Premer-Mınıstr Oljas Bektenov Ózbekstanǵa jumys saparymen baryp, birqatar mańyzdy kezdesýler ótkizdi, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Sapar aıasynda Úkimet basshysyn Ózbekstan prezıdenti Shavkat Mırzıeev qabyldady. Kezdesý barysynda eki eldiń qarym-qatynasy senim men ózara túsinistikke negizdelgen strategııalyq áriptestiktiń jarqyn úlgisi ekeni atap ótildi.
Byltyr Qazaqstan men Ózbekstan arasyndaǵy taýar aınalymy 4,5 mlrd dollarǵa teńeldi. Aldaǵy ýaqytta saýda-sattyq kólemin odan ári arttyrý, ekonomıkalyq baılanystardy nyǵaıta túsý mańyzdy.
Bul tóńirektegi máselelerdi pysyqtaý maqsatynda Úkimet basshysy Oljas Bektenov pen Ózbekstannyń premer-mınıstri Abdýlla Arıpovtyń tóraǵalyǵymen úkimettik deńgeıdegi kelissóz ótti. Onyń barysynda saýda-ekonomıkalyq, ınvestıtsııalyq, sý-energetıkalyq, kólik-logıstıkalyq jáne mádenı yntymaqtastyqty keńeıtý boıynsha qolǵa alynyp jatqan sharalar jaıy talqylandy.
«Eki el prezıdentteri Qazaqstan men Ózbekstan arasyndaǵy yntymaqtastyqty sapaly deńgeıge shyǵarý mindetin júktedi. Biz taýar aınalymyn arttyrý úshin mol múmkindik bar ekenin kórip otyrmyz. Sonymen qatar, ekijaqty jáne kópjaqty formattaǵy ózara is-qımyldardyń arqasynda joǵary nátıjege qol jetkizý úshin qajetti kúsh-jigerimizdi jumsaýǵa ázirmiz», - dep atap ótti Oljas Bektenov.
Óz kezeginde Ózbekstannyń premer-mınıstri Abdýlla Arıpov atap ótkendeı, eki eldiń senimdi dostyq ustanymyna uıyǵan qarym-qatynasy strategııalyq áriptestik pen odaqtastyqtyń odan ári nyǵaıa túsýine oń yqpal etedi.
«Bizdiń elderimizdiń kóshbasshylary eki el arasyndaǵy kópjosparly qatynastardy odan ári keńeıtý boıynsha naqty mindetter qoıdy. Olardy oryndaý úshin barlyq qajetti sharalardy qabyldaýǵa daıynbyz», - dep toqtaldy Abdýlla Arıpov.
Kelissózder barysynda Úkimet basshysy óńirdiń kólik-tranzıttik áleýettin odan ári arttyrý qajettigin atap ótti. Budan bólek, Oljas Bektenov Qazaqstan Ózbekstan narǵyna 500 mln dollarǵa baǵalanatyn 255 taýar túrin eksporttaýǵa daıyn ekenin aıtty.
Sondaı-aq, jumys sapary aıasynda Premer-Mınıstr Oljas Bektenov Tashkenttegi ónerkásiptik, turmystyq tehnıka, qurylys materıaldary, joǵary tehnologııalyq lıftiler men eskalatorlar jasap shyǵaratyn Texnopark-tiń jumysymen tanysty. 100 gektardan astam aýmaqqa ornalasqan ónerkásiptik keshende búginde 17 joba iske asyp jatyr. Osy rette Úkimet basshysyna ár tsehtegi jumys barysy tanystyrylyp, ónimdi shyǵarý tásilderi týraly aqparat usynyldy.
Aıta keteıik, qazirgi tańda ónerkásiptik kooperatsııa aıasynda 13,3 myńnan astam jumys ornyn qurýǵa múmkindik beretin 60 joba iske asyrylyp jatyr. Olardyń jalpy somasy 2,6 mlrd dollarǵa teń. Buǵan qosa, perspektıvaly dep baǵalanǵan taǵy 43 joba bar.
Ekijaqty saýda áleýetin odan ári arttyrý isinde «Ortalyq Azııa» halyqaralyq ónerkásiptik kooperatsııa ortalyǵynyń da mańyzy orasan. Toqtala ketsek, qazaq-ózbek shekarasynda ornalasatyn bul keshenniń qurylysy bıyl bastalady. Qazaqstannyń Túrkistan jáne Ózbekstannyń Syrdarııa oblystarynda salynatyn ónerkásiptik keshen 100 gektarǵa jýyq aýmaqty qamtıdy. Bizdiń el tarapynan 50 gektar jer bólinip, qurylysty júrgizetin ınvestor tabylǵan. Joba boıynsha, onda jabyq keshen salynyp, óndiris jáne kóterme saýdaǵa laıyqty jaǵdaı jasalmaq.
