Úkimet basshysy mınıstrler men ákimderge: Esep berý, prezentatsııa jasaý degendi doǵaryńyzdar
ASTANA. KAZINFORM – Búgin Úkimet otyrysynda Premer-mınıstr Oljas Bektenov ortalyq jáne jergilikti memlekettik organdar, ulttyq kompanııalar basshylaryna esep berý, prezentatsııa jasaýdy doǵarýdy tapsyrdy.
Úkimet basshysynyń atap ótýinshe, Prezıdenttiń «Turkistan» gazetine bergen baǵdarlamalyq suhbaty taıaý bolashaqta Úkimettiń aldynda turǵan maqsat-mindetterdi aıqyndap berdi.
- Barlyq ortalyq jáne jergilikti memlekettik organdar, ulttyq kompanııalar olardy tabysty júzege asyrý úshin bar kúsh-jigerin salyp jumys jasaýy kerek. Sózden iske kirisińizder. Kez kelgen máselege pragmatıkalyq turǵydan qarap, bıýdjet qarajatyn barynsha únemdep, naqty nátıje berýlerińiz qajet. Al esep berý, prezentatsııa jasaý degenniń bárin doǵarsańyzdar. Nátıje bolmasa onyń bári bos áńgime. Jumys isteı almasańyzdar ashyq aıtyńyzdar. Bul máseleni sheshemiz, - dedi Oljas Bektenov.
Osy rette Premer-mınıstr orynbasarlaryna Prezıdent tapsyrmalarynyń oryndalý barysyn óz baǵyttary boıynsha úılestirýdi tapsyrdy.
Aıta keteıik, keshe «Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.
