Úkimet basshysy men onyń orynbasarlary sý basqan óńirlerde júr

ASTANA. KAZINFORM – Qazir Premer-Mınıstr Oljas Bektenov jáne vıtse-premerler sý tasqynan zardap shekken óńirlerdi aralap júr.

«Premer-Mınıstrdiń basshylyǵymen respýblıkalyq shtab quryldy. Premer-Mınıstrdiń ózi, onyń orynbasarlary jáne Tótenshe jaǵdaılar mınıstri apat bolǵan aımaqtardy aralap júr. Barlyq qutqarý jumystary meniń tikeleı baqylaýymda», - dedi Qasym-Jomart Toqaev búgingi halyqqa úndeýinde. 

Prezıdenttiń aıtýynsha, sý tasqynymen kúresýge Tótenshe jaǵdaılar mınıstrliginiń barlyq resýrs tartyldy. 

«Sondaı-aq qutqarý jumystaryna Іshki ister mınıstrligi, Ulttyq ulan, Qarýly Kúshter jáne Ulttyq qaýipsizdik komıtetiniń mamandary belsene atsalysyp jatyr. Zardap shekken aımaqtardyń ákimdikteri kúndiz-túni jumys isteýde. Ondaǵan myń volonter de kómektesip júr. Jaǵdaı óte kúrdeli bolsa da, biz qıyndyqty mindetti túrde eńseremiz, barlyǵyn qalpyna keltiremiz. Eń bastysy – azamattardyń amandyǵy», - deıdi Memleket basshysy. 

Búgin Memleket basshysy eldegi sý tasqyny saldarynan qalyptasqan aýyr jaǵdaıǵa baılanysty halyqqa úndeý joldady.