Úkimet basshysy mashına jasaý óndirisin lokalızatsııalaýdy arttyratyn kelisimder ázirleýdi tapsyrdy
ASTANA. KAZINFORM — Mashına jasaý óndirisin lokalızatsııalaýdy kezeń-kezeńmen arttyrýǵa baǵyttalǵan úlgilik kelisimderdi ázirleý qajet. Bul týraly Úkimet otyrysynda Premer-mınıstr Oljas Bektenov aıtty.
— Bıznes memleketaralyq ótkizý beketterinde júkterdiń turyp qalý problemasymen kezigip otyr. Kólik, Qarjy mınıstrlikteri Ulttyq qaýipsizdik komıtetiniń Shekara qyzmetimen birlesip, shekarada jedel ári sapaly memlekettik qyzmet kórsetý jóninde sharalar qabyldaýy qajet, — dedi Oljas Bektenov.
Úkimet basshysynyń dereginshe, 2028 jyly jolaýshylar vagondarynyń parki 3 myńnan asady. Bul tozyǵy jetken vagondarǵa qatysty máseleni sheshýge múmkindik beredi.
— Alaıda jeke tasymaldaýshylar óz vagondaryn jańartýda qıyndyqtarǵa tap bolyp otyr. Osy maqsatta Kólik mınıstrligi jeke tasymaldaýshylardy qoldaý sharalaryn ázirleýi tıis. Bul jalpy jolaýshylar jáne júk tasymalynyń sapasyna oń áser etedi, — dedi Premer-mınıstr.
Sondaı-aq Oljas Bektenov Ónerkásip jáne Kólik mınıstrlikterine kásiporyndardy uzaqmerzimdi kelisimsharttarmen qamtamasyz ete otyryp, mashına jasaý óndirisin lokalızatsııalaýdy kezeń-kezeńmen arttyrýǵa baǵyttalǵan úlgilik kelisimderdi ázirleýdi tapsyrdy.
Aıta keteıik Oljas Bektenov temir jol jobalaryn ýaqytyly paıdalanýǵa berý qajettigin eskertti. Sonymen qatar jasandy ıntellekt tehnologııalaryn temirjolǵa da engizý kerektigin aıtty.