Úkimet basshysy mashına óndirisi týraly: Ekonomıkalyq patrıotızm basty qaǵıdatqa aınalýy kerek
ASTANA. KAZINFORM – Qazaqstandyq zaýyttar álemdik standarttarǵa saı keletin ónimder shyǵara alady. Otandyq akkýmýlıatorlar, transformatorlar men kabelder, lokomotıvter, avtomobılder men avtobýstar – osynyń aıqyn mysaly. Bul týraly QR Premer-Mınıstri Oljas Bektenov Úkimet otyrysynda aıtty.
Premerdiń aıtýynsha, sońǵy 5 jylda mashına jasaý úsh esege ósti. Ótken jyldyń qorytyndysy boıynsha óndirilgen ónim kólemi 4 trln teńgeden asty.
«Byltyr mashına jasaý salasyna shamamen 621 mln dollar tikeleı ınvestıtsııa tartyldy. Bul – rekordtyq kórsetkish. Búginde Qazaqstanda mashına jasaý ónimderiniń naryǵy 31,6 mlrd dollarǵa baǵalanady. Onyń shamamen 16% ǵana otandyq óndiris úlesine tıesili. Sondyqtan bul salanyń ósý áleýeti óte joǵary. Eksportty damytýda da múmkindikter bar», - dedi O. Bektenov Úkimettiń búgingi otyrysynda.
Premer-Mınıstr óńirlerdegi kóptegen mashına jasaý kásiporyndarynyń jumysymen tanysqanyn atap ótti.
«Bizdiń zaýyttar álemdik standarttarǵa saı keletin ónimder shyǵara alady. Otandyq akkýmýlıatorlar, transformatorlar men kabelder, lokomotıvter, avtomobılder men avtobýstar – osynyń aıqyn mysaly. Atalǵan ónimder syrtqy naryqtarǵa da shyǵyp jatyr. Biz qaı kezde de ózimizdiń otandyq óndirýshilerdi qoldaımyz. Bul rette ekonomıkalyq patrıotızm basty qaǵıdatqa aınalýǵa tıis. Biz qazaqstandyq ónimderdi satyp alyp, syrtqy naryqtarda belsendi túrde dáripteýimiz qajet», - dedi Oljas Bektenov.
Búginde Eýrazııalyq odaq naryǵynda mashına jasaý ónimderi ımportynyń jalpy kólemi orta eseppen 141 mlrd dollarǵa baǵalanyp otyr.
«Osy naryqtaǵy úlesimizdi odan ári ulǵaıtýymyz kerek. Bizdiń aldymyzda lokalızatsııalaý úlesi joǵary óndiris tsıklin qurý mindeti tur. Jumys tıimdiligin arttyrý úshin óndiristi der kezinde jańǵyrtyp otyrý mańyzdy. Qazir búkil álem tsıfrlyq tehnologııalardy, óndiristik protsesterdi robottandyrý men avtomattandyrýdy belsendi túrde engizip jatyr. Álemdik trendterden qalyp qoımaý úshin kásiporyndar jańa tehnologııalardy qoldanýǵa tıis», - dedi Úkimet basshysy.
Aıta keteıik, Ónerkásip jáne qurylys mınıstri Qanat Sharlapaev 9 aıda eldegi kásiporyndar 82 myńnan astam jeńil kólik shyǵarǵanyn málimdedi.
Sondaı-aq, 9 aıda elde 5 myńnan astam traktor men kombaın qurastyrylǵan.
