Úkimet basshysy Laslo Kevermen ekijaqty yntymaqtastyq máselelerin talqylady
ASTANA. KAZINFORM – Oljas Bektenov Majarstan Memlekettik jınalysynyń Tóraǵasy Laslo Kevermen kezdesý ótkizdi. Onda Prezıdent Qasym-Jomart Toqaevtyń 2024 jyly Majarstanǵa jasaǵan memlekettik sapary barysynda qol jetkizilgen ýaǵdalastyqtardy júzege asyrý máseleleri talqylandy.
Saýda-ekonomıkalyq jáne ınvestıtsııalyq salalardaǵy ekijaqty yntymaqtastyqqa, sonyń ishinde birlesken kásiporyndar qurýǵa, jańa óndiris oryndaryn salýǵa, sondaı-aq kólik-tranzıttik, mádenı-gýmanıtarlyq jáne tsıfrlyq salalardaǵy ózara is-qımylǵa nazar aýdaryldy.
Tsıfrlandyrý jáne jasandy ıntellektini damytý salasyndaǵy uzaqmerzimdi áriptestik perspektıvalary arnaıy qarastyryldy. Bul baǵyttar Prezıdenttiń elimizdegi tsıfrlyq transformatsııa aıasynda Qazaqstan Úkimetiniń aldyna qoıǵan mindetterine sáıkes keledi.
Majarstan – Qazaqstannyń Eýropalyq Odaqtaǵy mańyzdy seriktesi. Ótken jyly taýar aınalymy 6%-ǵa ósip, shamamen $200 mln-dy qurady. Bıylǵy alǵashqy 7 aıda kórsetkish 27%-ǵa ósip, $150 mln-nan asty. Qazaqstan Majarstanǵa 95 taýar pozıtsııasy boıynsha eksportty keńeıtýge daıyn, bul saýdanyń ósýi úshin eleýli perspektıvalar ashady.
Kólik-logıstıka salasy seriktestiktiń negizgi baǵyttarynyń biri bolyp qala beredi. Transkaspıı halyqaralyq kólik baǵyty erekshe mańyzǵa ıe, ol Transeýropalyq kólik jelisine ıntegratsııalanyp, qazaqstandyq júkterdiń Eýropaǵa jetýine jol ashady. Yntymaqtastyqty odan ári nyǵaıtý maqsatynda majarstandyq L.A.C. Holding kompanııasymen birlesip, Býdapeshtte 2026 jyly ıntermodaldy termınal salý josparlanýda.
Sonymen qatar Ekonomıkalyq yntymaqtastyq jónindegi úkimetaralyq komıssııanyń qyzmeti talqylandy.
Kezdesýge qatysýshylar ózara tıimdi ekonomıkalyq yntymaqtastyqty odan ári nyǵaıtýǵa daıyn ekenderin jetkizdi.