Úkimet basshysy Qyzylordada sý únemdeý tehnologııalaryn engizý barysyn tekserdi
ASTANA. KAZINFORM — Oljas Bektenov Qyzylorda oblysyna jumys sapary barysynda Prezıdenttiń agrarlyq sektorǵa sý únemdeý tehnologııalaryn engizý jónindegi tapsyrmalarynyń oryndalýyn tekserdi jáne óńirdiń sý sharýashylyǵy ınfraqurylymynyń jaı-kúıimen tanysty.
Úkimettiń baspasóz qyzmetiniń málimetinshe, Oljas Bektenov zamanaýı sý únemdeý tehnologııalary iske asyrylǵan Shıeli aýdanyndaǵy «Aqmaıa» sharýa qojalyǵynyń egis alqaptarynda boldy. Sharýashylyqta kúrish, kúzdik bıdaı jáne jońyshqa ósiriledi, al sýarý úshin sýdy utymdy tutyný júıeleri qoldanylady. Qoldanylǵan sheshimderdiń tıimdiligi osy jyldyń vegetatsııalyq kezeńiniń mysalynda kórsetildi.
Premer-mınıstr óńirdiń negizgi gıdrotehnıkalyq nysandarynyń jumysymen tanysty. Atap aıtqanda, Syrdarııa aýdanynda ornalasqan «Áıtek» sý torabynyń jumysy tekserildi. Sý toraby 2004 jyly SARATS jobasy aıasynda paıdalanýǵa berildi. «Áıtek» esebinen 13 myń gektar egis alqaby men 3 319 gektar kól júıesi, sondaı-aq 120,8 myń gektar shabyndyq jáne jaıylymdyq jerler sýmen qamtamasyz etiledi.
Oljas Bektenov Qyzylorda qalasy, Qyzylózek aýyldyq okrýgine qarasty 120 myń gektardan astam aýmaqtaǵy kól júıesi men jaıylymdyq jerlerdi sýmen qamtamasyz etetin Qaraózek arnasynyń ústinen ushyp ótti.
Qyzylorda sý torabyn aralaý barysynda sý resýrstary jáne ırrıgatsııa mınıstri Nurjan Nurjigitov pen oblys ákiminiń orynbasary Baqyt Jaqanov óńirdegi aǵymdaǵy sý sharýashylyǵy jaǵdaıy men qabyldanyp jatqan sharalar týraly baıandady. Qyzylorda sý toraby 1956 jyly paıdalanýǵa berilgen jáne 120 myń gektar aýmaqty sýarýdy qamtamasyz etedi.
Sapar barysynda Premer-mınıstr Memleket basshysynyń sý únemdeý tehnologııalaryn belsendi engizý jónindegi alǵa qoıǵan mindetine nazar aýdardy. Bul qazirgi gıdrologııalyq jaǵdaıda óte ózekti. Osyǵan baılanysty Úkimettiń basymdyǵy — aýyl sharýashylyǵy óndirýshilerin turaqty sýmen qamtyp, onyń ishinde olardyń sýdy tıimdi paıdalanýdyń zamanaýı tehnologııalaryna kezeń-kezeńimen kóshýi esebinen qamtamasyz etý.
Osy turǵyda 2024 jyly Sý jáne ırrıgatsııa mınıstrligi Aýyl sharýashylyǵy mınıstrligimen birlesip ınvestıtsııalyq sýbsıdııalaý jáne sýarmaly sý erejelerine tıisti ózgerister engizdi. Endi tamshylatyp jáne jańbyrlatyp sýarýdy engizgen sharýashylyqtarmen sýdy paıdalanýǵa arnalǵan kelisimsharttar basym tártippen jasalada. Qalǵandary qaldyq kólem jáne sýdy únemdeıtin sheshimderge kóshý mindettemesi bolǵan jaǵdaıda ǵana resýrstarǵa sene alady.
Júıelik deńgeıde egis qurylymyn ártaraptandyrý jumystary júrgizilýde. AÓK-ni damytýdyń 2030 jylǵa deıingi tujyrymdamasyna sáıkes ylǵalsúıgish daqyldardyń egistigin qysqartý kózdeledi. Atap aıtqanda, kúrish pen maqta alqaby 41 myń gektarǵa, onyń ishinde kúrish alqaby 10 myń gektarǵa azaıady. Sonymen birge júgeri men jem-shóp daqyldarynyń óndirisi keńeıip, aýyl sharýashylyǵy ónimderin tereń óńdeý damýda. Bul sharalar sýarmaly jerlerdegi sý tutynýdyń úlesin kem degende 20%-ǵa tómendetýge baǵyttalǵan. Óńirde sý balansynyń turaqtylyǵyn qamtamasyz etý úshin melıoratsııa boıynsha sharalar engiziledi: Túrkistan jáne Qyzylorda oblystarynda 118 tik drenaj júıesi jáne 243 sorǵy agregaty iske qosyldy. Kollektorlyq-drenajdy sýdy qaıta paıdalaný júzege asyrylady jáne kezektestire ári túngi sýarý júıesi tájirıbeden ótip jatyr.
Sapar qorytyndysy boıynsha Oljas Bektenov sýdy tıimdi paıdalaný tájirıbesin keńeıtý jáne sharýalardy sýarýdyń zamanaýı ádisterine kóshýge yntalandyrý qajettigin atap ótti. Jalpy, Úkimet bul baǵyttaǵy jumysty óńirlermen, jaýapty mınıstrliktermen jáne sý paıdalanýshylarmen úılestire jalǵastyratyn bolady.
Budan buryn Bektenov Túrkistan oblysynyń sý sharýashylyǵy ınfraqurylymynyń nysandaryn teksergenin jazǵanbyz.