Úkimet basshysy: Investorlardyń búkil máselesin áýre-sarsańǵa salmaı, jedel sheshý kerek

ASTANA. KAZINFORM – Investorlardyń barlyq suraǵyn áýre-sarsańǵa salmaı, jedel sheshý kerek. Bul týraly Úkimet otyrysynda Premer-Mınıstr Oljas Bektenov aıtty.

«Bıyl Indýstrııalandyrý kartasy aıasynda óńdeý ónerkásibiniń 180 jobasyn iske qosyp, 18 myńnan astam jańa jumys ornyn qurý josparlanǵan. Ónerkásip mınıstrligi salalyq memlekettik organdarmen jáne óńir ákimdikterimen birlesip, osy jobalardy ýaqtyly iske qosýdy qamtamasyz etýi qajet. Investorlardyń barlyq suraqtaryn áýre-sarsańǵa salmaı, jedel sheshý kerek. Osyǵan arnaıy ınvestıtsııalyq shtab jumys isteıdi», - dedi Oljas Bektenov.

Onyń aıtýynsha, qazaqstandyq óndirýshilerdi qoldaý jáne damytý úshin óńdeý ónerkásibindegi otandyq kásiporyndardy shıkizatpen qamtamasyz etý máselesi zańnamalyq turǵydan retteldi.

Qazir tústi metaldardy qaıta óńdeý salasynda bul mehanızm oń nátıje kórsetip otyr. 

Sondyqtan osy tájirıbeni el ishinde óndiriletin jáne óńdeý kólemin ulǵaıtýǵa bolatyn basqa da shıkizat túrlerine taratý qajet. 

«Ónerkásip mınıstrligi múddeli memlekettik organdarmen jáne uıymdarmen birge osy mehanızmdi ónerkásiptiń barlyq negizgi salalarynda qoldanýdy qamtamasyz etýge tıis», - dedi Premer-Mınıstr.

Úkimet basshysy búgingi tańda qurylys materıaldary óndirisinde oń dınamıka bar ekendigine toqtaldy.

Olardyń úlesi bir jyl ishinde 68 paıyzǵa deıin ósti. Bul baǵytty odan ári belsendi damytý qajet.

«Ónerkásip jáne qurylys mınıstrligine «Báıterek» holdıngimen birlesip, ımportty almastyratyn qurylys materıaldaryn óndirý jobalaryn jeńildikpen qarjylandyrý máselesin pysyqtaýdy tapsyramyn. Sonymen birge qurylys materıaldaryna degen suranystyń ulǵaıǵanyn eskerip, «Samuryq-Qazyna» holdıngi men óńir ákimdikterine «Jaıly mektep» ulttyq jobasy boıynsha jergilikti qamtý deńgeıine jáne sý tasqynynan keıingi qalpyna keltirý jumystaryna baqylaýdy kúsheıtýdi tapsyramyn», - dedi Oljas Bektenov.