Úkimet basshysy halyqaralyq arbıtrajdyq talqylaýlardyń uzaqqa sozylý sebebin túsindirdi
ASTANA. KAZINFORM — Kaspıı jáne Qarashyǵanaq jobalary boıynsha arbıtrajdyq talqylaýlardyń uzaqtyǵy qarjylyq aqparattyń aýqymdy kólemin taldaý qajettiligine baılanysty. Bul týraly Májilis depýtattarynyń saýalyna Premer-mınıstr Oljas Bektenovtiń jaýabyndja aıtylǵan.
— Soltústik Kaspıı jáne Qarashyǵanaq jobalary boıynsha arbıtrajdyq talqylaýlar Qazaqstan men merdigerler arasyndaǵy ónimdi bólý týraly kelisimder aıasyndaǵy sharttyq qatynastardan týyndaıtyn kommertsııalyq daý ekenin atap ótemiz. Atalǵan protsester halyqaralyq arbıtrajdyq ınstıtýttarda qaralady. Memlekettiń múddelerin qorǵaý úshin Úkimet halyqaralyq konsýltanttar men tehnıkalyq sarapshylardy tartý boıynsha keshendi jumys júrgizdi, operatsııalarǵa aýdıt jasalýda jáne dáleldemelik baza qalyptastyrylyp otyr, — dedi Premer-mınıstr.
Onyń aıtýynsha, arbıtrajdyq protsester bekitilgen is júrgizý kestelerine sáıkes ótedi.
— Sondaı-aq halyqaralyq arbıtrajdyq talqylaýlardyń uzaqtyǵy olardyń joǵary kúrdeliligine, kópsatylylyǵyna jáne tehnıkalyq ári qarjylyq aqparattyń aýqymdy kólemin taldaý qajettiligine baılanysty ekenin eskerý qajet. Bul halyqaralyq tájirıbede jalpy qabyldanǵan jaǵdaı sanalady. Osylaısha Úkimet halyqaralyq quqyq normalaryn saqtaı otyryp, quqyqtyq alańda ulttyq ekonomıkalyq múddelerdi dáıekti túrde qorǵap keledi. Memleket múddelerin qorǵaý jónindegi jumys erekshe baqylaýda tur, — dedi Úkimet basshysy.
Aıta keteıik, Májilis depýtaty Qazbek Isa Úkimet basshysyna saýal joldap, onda sheteldik korporatsııalar sottyq jáne bıýrokratııalyq sozbalańdyq arqyly devalvatsııadan paıda kóretin tájirıbege núkte qoıýdy usynǵan edi.
2024 jyly Qazaqstannyń arbıtrajdyq protsesterine 10 mlrd teńge bólingen bolatyn.