Úkimet basshysy CITIC Construction kompanııasynyń birinshi vıtse-prezıdenti ıAn Tszıantsıanmen kezdesti

QR Premer-Mınıstri Álıhan Smaıylovtyń CITIC Construction kompanııasynyń birinshi vıtse-prezıdenti ıAn Tszıantsıanmen kezdesýi barysynda «Taldyqorǵan – Óskemen» jáne «Qaraǵandy – Balqash» respýblıkalyq avtojoldaryn kúrdeli jóndeý máseleleri talqylandy.

Bul týraly Kazinform Úkimettiń baspasóz qyzmetine silteme jasap habarlaıdy.

Úkimet basshysy atalǵan iri jobalardyń ýaqtyly aıaqtalýyn jáne sapaly oryndalýyn qamtamasyz etý qajettigin atap ótti.

«Kelesi maýsymdaǵy jumystar úshin jol-qurylys materıaldaryn, onyń ishinde qıyrshyq tas pen bıtýmdy aldyn ala daıyndaý qajet. Qosalqy merdigerlik uıymdar da osyndaı jumys júrgizýi tıis», — dedi Álıhan Smaıylov.

Sonymen qatar Premer-Mınıstr júrgizýshilerdiń qaýipsizdigin qamtamasyz etý úshin joldardy qysta kútip ustaý jumystaryn baqylaýǵa alý qajettigine de toqtaldy.

Kezdesý barysynda CITIC Construction kompanııasynyń Qazaqstan aýmaǵyndaǵy basqa da avtojol jobalaryna qatysý múmkindikteri, sondaı-aq kompanııanyń ónerkásip jáne aýyl sharýashylyǵy salalaryndaǵy ınvestıtsııalyq jobalardy iske qosý bastamalary talqylandy.

Ortalyq memlekettik organdar tarapynan tıisti jobalardy pysyqtaýda qajetti qoldaý kórsetiletini atap ótildi.