Úkimet basshysy BJZQ qarajatyn ınfraqurylymǵa tartý múmkindigin túsindirdi

Úkimet ındýstrııalandyrý, kólik, ınfraqurylym salalarynda qarjylandyrýdy qajet etetin iri jobalardy qarastyryp jatyr. Bul týraly Premer-Mınıstr Álıhan Smaıylov málim etti, dep habarlaıdy Kazinform.

Búgin Senattyń jalpy otyrysynan keıin tilshiler Biryńǵaı jınaqtaýshy zeınetaqy qorynan 1,5 trln teńgeni energetıkalyq ınfraqurylymǵa ınvestıtsııalaý múmkindigi jaıly surady.

«Bul qarajattyń qaıtarymdylyǵyna Úkimet qandaı kepildik beredi?», - dep surady jýrnalıster.

«Zeınetaqy qorynyń mindeti – salymshylardyń zeınetaqy aktıvteriniń saqtalýyn qamtamasyz etý jáne ulǵaıtý. Bul rette, zeınetaqy qory tıisti ınvestıtsııalyq strategııany qabyldady. Salymshylardyń aktıvterin tek osy qarajatty kez kelgen kiris ákeletin baǵyttarǵa salý arqyly kóbeıtýge bolady. Osy ınvestıtsııalyq strategııaǵa sáıkes, zeınetaqy qory naryqtyq qaǵıdattar boıynsha aktıvterdiń kólemin ulǵaıtýǵa ekpin qoıyp otyr», - dedi Á. Smaıylov.

Onyń aıtýynsha, qazir Úkimet ındýstrııalandyrý, kólik, ınfraqurylym salalarynda qarjylandyrýdy qajet etetin iri jobalardy qarastyryp jatyr. Osy rette ártúrli qarjylandyrý kózderin, sonyń ishinde zeınetaqy qorynan da qarajat qarastyrylyp otyr.

«Qazir biz qarajat tartý sharttaryn Ulttyq bankpen birge pysyqtap jatyrmyz. Úkimet qaryz alatyn bolsa, ol óz qaryzdary úshin bul qarajatty respýblıkalyq bıýdjet esebinen, kvazımemlekettik sektor esebinen óteýdi qamtamasyz etedi. Sondyqtan Úkimet qaryz alsa, ol memlekettik qaryzda kórsetiledi. Bul qaryz óteý bıýdjette belgilenedi. Atap aıtqanda, Úkimet qaryz jóninde mindetteme alsa, onda bul qaryzdardy óteý úshin qarajat qarastyrylady. Bul rette, qarajattyń qaıtarylýy mindetti túrde qamtamasyz etiledi», - dedi Álıhan Smaıylov.

Budan buryn habarlanǵandaı, jaqynda buqaralyq aqparat quraldarynda qazaqstandyqtardyń zeınetaqy jınaqtarynan 1,5 trıllıon teńge ınfraqurylymdyq jobalarǵa jumsalýy múmkin ekeni habarlanǵan edi.

Osy oraıda Energetıka mınıstri Almasadam Sátqalıev pikir bildirdi.