Úkimet basshysy balalardy zııandy kontentten qorǵaý úshin batyl sheshimder qabyldaýdy tapsyrdy

ASTANA. KAZINFORM — Premer-mınıstr Oljas Bektenov balalardy áleýmettik jelilerdegi zııandy kontentten qorǵaý úshin batyl sheshimder qabyldaýdy tapsyrdy.

Búgingi Úkimet otyrysynda Premer-mınıstr Oqý-aǵartý mınıstri Juldyz Súleımenovadan: «Balalardyń aqparattyq qaýipsizdigin qamtamasyz etý óte mańyzdy. Osy baǵytta qandaı jumystar atqarylyp jatyr?», - dep suraǵan edi.

Mınıstrdiń aıtýynsha, búginde qabyldanǵan zańdardyń aıasynda balalardyń derekteri bekitiletin platformalarǵa talap kúsheıtilgen. Munan bólek, balalardy áleýmettik jelilerdegi zııandy kontentten qorǵaý úshin olardyń áleýmettik jelini qoldanýyn jasyna baılanysty shekteýge qatysty zańnamalyq normalar ázirlenip jatyr.

- Zııandy kontentten qorǵaý máselesinde balalarymyzdyń jas erekshelikterine baılanysty birqatar tetik bekitiledi, - dedi Juldyz Súleımenova.

Osy oraıda Oljas Bektenov mınıstrge atalǵan baǵytta batyl sheshimder qabyldaýdy tapsyrdy.

Aıta keteıik, búgin Úkimet «Qazaqstan balalary» tujyrymdamasyn pysyqtady.