Úkimet basshysy aýyl sharýashylyǵynda biryńǵaı tsıfrlyq ekojúıeni ázirleýdi tapsyrdy
ASTANA. KAZINFORM — Aýyl sharýashylyǵy mınıstrligi biryńǵaı ulttyq tsıfrlyq ekojúıeni ázirleý jumysyn jedeldetýi qajet. Bul týraly Úkimet otyrysynda Premer-mınıstri Oljas Bektenov málim etti.
- Agroónerkásip kesheninde derekterdiń shashyrańqy bolýy jer jaǵdaıy men óndiristiń jaı-kúıinen bastap memlekettik qoldaý men ónimdi satýǵa deıingi tutas ahýaldy baǵalaýǵa múmkindik bermeıdi. Sondyqtan Aýyl sharýashylyǵy mınıstrligi biryńǵaı ulttyq tsıfrlyq ekojúıeni ázirleý jumysyn jedeldetýi qajet. Onda barlyq negizgi protsester men derekter ózara baılanysty bolýǵa tıis. Biz árkelki salalyq ákimshilendirýden aýyl sharýashylyǵyn derekter negizinde basqarýǵa kóshýimiz kerek. Túptep kelgende, qandaı ónim, qaı jerde jáne qandaı kólemde óndiriledi, memleket osynyń bárin naqty ýaqyt rejıminde túsinýi qajet. Al memlekettik qoldaý sharalary ataýly túrde, ashyq ári naqty derekterge súıene otyryp usynylýy kerek. Dál osy tásil ónimdilikti arttyrýǵa negiz bolýǵa tıis, - dedi O.Bektenov.
Osy oraıda Úkimet basshysy Aýyl sharýashylyǵy mınıstrligi bir aı ishinde sharýashylyqtardyń tsıfrlyq derekterin paıdalana otyryp, birinshi kezekte proaktıvti formatqa kóshiriletin memlekettik qoldaý sharalaryn aıqyndaýy kerek ekenin atap ótti.
Aıta keteıik, 2029 jylǵa qaraı IT-eksportty keminde 2 mlrd AQSh dollaryna jetkizý josparlanǵan.
