Úkimet basshysy Astanada ashylǵan shańǵy bazasyna bardy

ASTANA. KAZINFORM – Premer-mınıstr Oljas Bektenov Astananyń ortalyq saıabaǵynda ashylǵan jańa shańǵy bazasyna bardy. Nysannyń qurylys jumystary 2026 jyldyń qańtarynda aıaqtalǵan. Jobanyń quny 1,8 mlrd teńgeni quraǵan. 

Eki qabatty ǵımarattyń jalpy aýdany – shamamen 2 myń sharshy metr, ótkizý qabileti bir aýysymda 300 adamǵa deıin jetedi. Onda 30 jumys orny ashylǵan.

Munda kúshtik qondyrǵylarmen jáne mamandandyrylǵan jabdyqtarmen, sonyń ishinde «ERCOLINA» trenajerimen jaraqtandyrylǵan keń jattyǵý zaly da bar. Jyl boıy tehnıkany shynyqtyrýǵa jáne konkımen syrǵanaý tehnıkasyn ımıtatsııalaýǵa múmkindik beretin «Skate Treadmill RL3500E» kásibı trenajeri ornatyldy.

Trenajer júktemeler qarqynyn dál retteýge jáne mamandardyń baqylaýymen qaýipsiz jattyǵýlardy uıymdastyrýǵa kómektesedi, bul ásirese sportshylardy daıarlaýda mańyzdy. Sonymen birge, shańǵylar men sporttyq jabdyqtardy daıyndaý, saqtaý jáne keptirý úshin úı-jaılar qarastyrylǵan.

Oljas Bektenov zamanaýı sporttyq ınfraqurylymdy damytý eldiń olımpıadalyq áleýetin nyǵaıtý mindetterimen tikeleı baılanysty ekenin atap ótti.

– Memleket basshysy buqaralyq sportty damytýǵa, salaýatty urpaqty tárbıeleýge jáne jalpy ult densaýlyǵyn nyǵaıtýǵa erekshe nazar aýdarady. Zamanaýı sport ınfraqurylymy men qoljetimdi ári sapaly baza qalyptastyrmaı, muny isteý múmkin emes. Qazir Italııada Olımpıada oıyndary ótip jatyr jáne biz sportshylarymyzdyń jeńiske jetýi úshin jaǵdaı jasaýdyń qanshalyqty mańyzdy ekenin kórip otyrmyz, sondyqtan memleket sportshylarymyzǵa eń joǵary deńgeıde jattyǵýǵa múmkindik beretin ınfraqurylym daıyndaýda. Buqaralyq sport pen olımpıadalyq rezervti qoldaý – ult densaýlyǵyna jáne eldiń halyqaralyq ımıdjine salynǵan ınvestıtsııa, – dep atap ótti Premer-mınıstr.

Jańa shańǵy bazasy balalar men jasóspirimder sport mektebiniń, olımpıadalyq rezervti daıarlaý ortalyǵynyń jáne joǵary sport sheberligi mektebiniń tárbıelenýshilerin daıarlaýdyń negizgi alańyna aınalatyny da aıtyldy.

Shańǵy jarystarynan bólek, bazada bıatlon jáne sporttyq baǵdarlaý da damytylady. Bastapqy kezeńde 15 jattyqtyrýshynyń jetekshiligimen shamamen 180 sportshy jattyǵady, al bolashaqta sportshylar sanyn 360 adamǵa deıin arttyrý josparlanǵan. Munda sport mektepteriniń kásibı stýdentteri ǵana emes, shańǵy sportynyń áýesqoılary da jattyǵa alady. Buqaralyq sport úshin qala turǵyndaryna nysannyń trassalary men ınfraqurylymyn yńǵaıly paıdalanýǵa múmkindik beretin jaǵdaılar jasalmaq.

Jalpy respýblıka boıynsha buqaralyq sportty damytý sheńberinde ınfraqurylym keńeıtilip, azamattardyń júıeli sportpen shuǵyldanýy artyp keledi. Halyqtyń sport nysandarymen qamtylý deńgeıi 2023 jylǵy 52,2%-dan 2025 jyly 59,6%-ǵa deıin ósti. Dene shynyqtyrýmen jáne sportpen únemi aınalysatyn halyqtyń úlesi 40,4%-dan 44,5%-ǵa deıin artqan.

Jumys saparynyń qorytyndysy boıynsha Premer-mınıstr salalyq mınıstrlikter men Astana qalasy ákimdigine birqatar tapsyrma berdi. Atap aıtqanda, olımpıadalyq rezervti daıyndaý úshin ınfraqurylymdy odan ári damytýdy qamtamasyz etý jáne jastardy buqaralyq sportqa tartý baǵdarlamalaryn keńeıtý, sondaı-aq ónimdilik pen eksporttyq áleýetti arttyrýǵa basa nazar aýdara otyryp, ShOB-ty júıeli qoldaýdy jalǵastyrý tapsyryldy.

Buǵan deıin Premer-mınıstr tabıǵı gazben jumys isteıtin JEO-3-tiń negizgi jabdyqtaryn qarap shyqqan edi. 

Sondaı-aq Premer-Mınıstr Astanadaǵy órt sóndirý tehnıkasyn jasaıtyn zaýytqa bardy.