Úkimet basshysy «ArselorMıttal Temirtaý» shartyna qatysty pikir bildirdi

Premer-Mınıstr Álıhan Smaıylov «ArselorMıttal Temirtaý» kásipornyn qaıtarýǵa qatysty túsinik berdi, dep habarlaıdy Kazinform. 

«Biz qazir osy baǵytta naqty jumys istep jatyrmyz jáne biz ózimizge sońǵy merzim belgiledik. ıAǵnı qarashanyń aıaǵyna deıin kelisimshartty bekitý eskerilgen. Barlyq jospar oıdaǵydaı iske asyrylsa, kelesi aptada biz ony aıaqtap, shart nátıjesin jarııalaımyz. Osy AMT kásipornyn satyp alýǵa bıýdjet qarajaty jumsalmaıtynyna, ınvestordyń qarajaty tartylatynyna taǵy da nazarlaryńyzdy aýdarǵym keledi. Investordyń qarajaty esebinen biz bul kásiporyndy Mıttaldan qaıtaryp alamyz», - dedi Á.Smaıylov Senattyń jalpy otyrysynan keıin tilshiler suraǵyna jaýap bere otyryp.

Onyń aıtýynsha, aldyn ala kelisim bir aı buryn jasalǵan.

«Al endi biz kelesi aptada jospar boıynsha satyp alý-satý jónindegi qorytyndy kelisimge qol qoıýymyz kerek. Bul kelisimge qol qoıylmaı turyp biz ınvestordyń kim ekenin aıta almaımyz. Biraq budan keıin mindetti túrde habarlaımyz», - dep ýáde berdi Premer-Mınıstr.

Buǵan deıin Ónerkásip jáne qurylys mınıstri Qanat Sharlapaev atalǵan kásiporyn aktıvin Qazaqstan Respýblıkasynyń paıdasyna ótkizýge mindetteıtin zańdy qujatqa qol qoıǵansha, kelisimniń qandaı da bir shartyn aıta almatynyn málim etti.