Úkimet basshysy Aqmola oblysynyń ındýstrııalyq aımaǵynyń jobalarymen tanysty
ASTANA. KAZINFORM — Premer-mınıstr Oljas Bektenov Aqmola oblysynda Prezıdenttiń ónerkásiptik áleýetti damytý jáne ınvestıtsııalyq ahýaldy jaqsartý jónindegi tapsyrmalarynyń oryndalý barysyn tekserdi, dep habarlaıdy Úkimettiń baspasóz qyzmeti.
Oljas Bektenov Kókshetaý qalasyndaǵy aýyl sharýashylyǵy ónimderin qaıta óńdeý, jeńil ónerkásip, mashına jasaý jáne qurylys materıaldaryn óndirý jónindegi jobalarǵa arnalǵan Kokshe Industry ındýstrııalyq aımaǵynyń damýymen tanysty.
IA aýmaǵynda júzege asyp jatqan jańa óndiris nysandaryn aralap kórdi. Olardyń qatarynda «MM Brick» JShS-niń kirpish zaýyty, «Sodrýjestvo Kazahstan» JShS-niń maıly daqyldardy qaıta óńdeý kesheni, «Kedentransservıs» AQ-nyń Qazaqstan-Qytaı qurǵaq portyn (logıstıkalyq termınal) salý jobasy jáne taǵy basqalar bar.
Kókshetaý qalasynyń ákimi Ánýar Kúmpekeev ındýstrııalyq aımaqtyń jalpy aýdany 600 gektardy quraıtynyn, qazirgi ýaqytta 2026-2027 jyldarǵa iske qosý josparlanǵan, 670 jańa jumys ornyn ashýǵa múmkindik beretin, jalpy somasy 22,7 mlrd teńge bolatyn jobalar júzege asyrylýda ekenin baıandady. 2030 jylǵa deıin 520 mlrd teńgeden astam somaǵa 40-qa jýyq ınvestıtsııalyq joba tartý kózdelgen. Indýstrııalyq aımaqtyń ınvestıtsııalardy tartý jáne jańa óndiristerdi iske qosý jumystarynda negizgi platforma retindegi róli atap ótildi. Sonymen qatar, ınjenerlik jáne kólik ınfraqurylymyn aldyn ala júrgizý qajettigine nazar aýdaryldy.
«Qazaqstan Agro Innovatsııalyq Korporatsııasy» JShS alańynda Premer-mınıstr aýyl sharýashylyǵy jáne kommýnaldyq tehnıkany shyǵarý boıynsha kásiporynnyń óndiristik qýattaryn qarap shyqty. Zaýyttyń aǵymdaǵy qyzmeti men damý josparlary týraly bas dırektor Oleg Balybın baıandady. 2025 jyldyń qorytyndysy boıynsha kásiporyn 65 mlrd teńgege 4 myńnan astam tehnıka jasap shyǵardy.
Óndiristi keńeıtý boıynsha jobanyń tórtinshi kezegi júzege asyryldy: 3 mlrd teńgeden astam ınvestıtsııa óndiristi jylyna 5 myńǵa deıin ulǵaıtýǵa, qosymsha jumys oryndaryn ashýǵa, ónimdilikti arttyrýǵa jáne otandyq jetkizýshilermen kooperatsııany kúsheıtýge múmkindik beredi.
Qazir ındýstrııalyq aımaq aýmaǵynda aýyl sharýashylyǵy, arnaıy jáne kommýnaldyq tehnıkalardy óndirý qýatyn jylyna 6 myń birlikke deıin keńeıtý jobasy josparlanǵan. Jobanyń jalpy ınvestıtsııa kólemi 10 mlrd teńgege deıin jetedi. Búgingi tańda kásiporynda 400-ge jýyq adam jumys isteıdi.
— Premer-mınıstr ındýstrııalyq jobalardy jedel iske qosýdyń jáne mashına jasaýdaǵy lokalızatsııalaý deńgeıin arttyrýdyń mańyzdylyǵyn atap ótti. Ónerkásip jáne qurylys, Aýyl sharýashylyǵy mınıstrlikterine jáne Aqmola oblysynyń ákimdigine «Qazaqstan Agro Innovatsııalyq Korporatsııasy» JShS óndirisin keńeıtý jónindegi josparlardy qoldaýdy, ınfraqurylymdy ýaqtyly júrgizýdi jáne Kokshe Industry ındýstrııalyq aımaǵynyń aýmaǵynda ınvestorlar úshin qolaıly jaǵdaılar jasaýdy qamtamasyz etý boıynsha tapsyrma berildi, — delingen habarlamada.
Budan buryn Bektenov Aqmola oblysyna jumys sapary aıasynda Prezıdenttiń energetıkalyq qaýipsizdikti nyǵaıtý, jańa qýat kózderin arttyrý jáne óńir ınfraqurylymyn damytý jónindegi tapsyrmalarynyń oryndalý barysyn teksergeni belgili boldy.
