Úkimet basshysy «Adal azamat» baǵdarlamasyn iske asyrý josparyn bekitýdi tapsyrdy
ASTANA. KAZINFORM – Oqý nátıjeleri úshin kolledjder men joǵary oqý oryndarynyń jaýapkershiligin arttyrý sharalaryn pysyqtaý qajet. Bul týraly Úkimet otyrysynda Premer-mınıstr Oljas Bektenov aıtty.
– Bıyl memlekettik tapsyrys boıynsha kolledjderge tehnıkalyq jáne kásiptik bilim alý úshin 150 myńǵa jýyq stýdent qabyldanady. Kolledjder dýaldy oqytý, qamqorlyqqa alý, óndiristik tájirıbe arqyly kásiporyndarmen tyǵyz jumys isteýge tıis. Árbir stýdent eńbek naryǵynyń talaptaryna sáıkes naqty kásibı daǵdylarǵa ıe bolýy kerek. Sondaı-aq joǵary oqý oryndarynyń jańa oqý jylyna daıyndyǵyn qamtamasyz etý kerek. Infraqurylym men jataqhana ǵana emes, sonymen qatar oqý baǵdarlamalarynyń zaman talabyna saı bolýyn da nazarda ustaý qajet. Mamandar tapshy bolyp otyrǵan ınjenerlik, IT, pedagogıkalyq, medıtsınalyq baǵyttarǵa erekshe nazar aýdarǵan jón, - dedi Úkimet basshysy.
Osy oraıda Oljas Bektenov Oqý-aǵartý mınıstrligine múddeli memlekettik organdarmen jáne ákimdiktermen birge bir aı merzimde «Adal azamat» biryńǵaı bilim berý baǵdarlamasyn iske asyrý jónindegi vedomstvoaralyq is-sharalar josparyn bekitýdi tapsyrdy. Bul tárbıe jáne oqytý júıesin qalyptastyrý boıynsha keshendi ári jan-jaqty sharalar qabyldaýǵa múmkindik beredi.
– Іshki ister mınıstrligi jańa oqý jylynan bastap «Nazar aýdaryńyz, balalar!» jedel aldyn alý sharalaryn uıymdastyryp, ótkizsin. Ony buqaralyq aqparat quraldarynda jarııa etsin. Óńir ákimdikteri bilim berý nysandarynyń mańyndaǵy, ásirese jańadan paıdalanýǵa beriletin mektepterdiń jol ınfraqurylymyn jaqsartý jumystaryn kúsheıtýi qajet. Іshki ister mınıstrligi Oqý-aǵartý mınıstrligimen birge júıeli túrde profılaktıkalyq sabaqtar, atap aıtqanda mektep oqýshylarymen negizgi qaýipsizdik erejeleri, onyń ishinde joldaǵy qaýipsizdik boıynsha ınteraktıvti sabaqtar ótkizsin. Oqý-aǵartý, Ǵylym jáne joǵary bilim mınıstrlikteri bilim berý baǵdarlamalarynyń praktıkalyq baǵytta bolýyna basa mán berý jóninde sharalar qabyldasyn. Sondaı-aq oqý nátıjeleri úshin kolledjder men joǵary oqý oryndarynyń jaýapkershiligin arttyrý boıynsha sharalardy pysyqtaý qajet, - dedi ol.
Aıta keteıik, Oljas Bektenov mektepterdi jóndeý jumysy baıaý júrip jatqan óńirlerdi ataǵan edik.