Úkimet basshysy 0,6% ǵana ósken ınvestıtsııa týraly: Memlekettik organdardyń sapasyz jumysyn kórsetedi

ASTANA. KAZINFORM – Úkimet basshysy el ekonomıkasyna salynǵan ınvestıtsııalar kólemin synady.

«Bıyl qańtarda negizgi kapıtalǵa salynǵan ınvestıtsııalar nebári 0,6%-ǵa ósken. Mundaı tómen kórsetkishter ýákiletti memlekettik organdar men ákimdikterdiń sapasyz jumysyn kórsetedi. Investıtsııalyq shtab jumysyn kúsheıtý qajet, oǵan jetkilikti ókilettikter berilgen. Mınıstrler men ákimderdiń basty mindeti – ınvestıtsııalyq jobalardy iske asyrýǵa tıimdi ári pármendi qoldaý kórsetý. Memleket basshysy Úkimettiń aldyna 2029 jylǵa qaraı ulttyq ekonomıka kólemin 450 mlrd dollarǵa deıin, ıaǵnı 2 ese ulǵaıtý týraly aýqymdy mindet qoıdy», - dedi Oljas Bektenov Úkimet otyrysynda. 

Úkimet basshysy memlekettik organdar aldyna kem degende 150 mlrd dollar tikeleı sheteldik ınvestıtsııa tartý mindetin qoıdy. 

Onyń aıtýynsha, ınvestıtsııa ekonomıkanyń ósýin yntalandyrady, sol sııaqty jańa óndiristerdi, jumys oryndaryn ashýǵa, ınfraqurylymdy damytýǵa, ónimdilikti arttyrýǵa múmkindik beredi.

Sondaı-aq, Premer-Mınıstr ınvestıtsııalar jalpy ishki ónimniń ósýiniń negizgi draıveri retinde mańyzdy ról atqaratynyn aıtty. 

«Sondyqtan, durys ınvestıtsııalyq saıasat qalyptastyrý - negizgi faktor. Investıtsııa tartýdyń birtutas ekojúıesin qurý, ınvestıtsııalyq jobalarǵa tıimdi qoldaý kórsetý, sondaı-aq jobalardy ýaqtyly iske asyrý úshin jaǵdaı jasaý Úkimettiń osy baǵyttaǵy úılesimdi jumysynyń kórsetkishi», - deıdi ol.