Úkimet basy artyq bıýrokratııadan arylyp, jedel jumys isteýi kerek — Memleket basshysy

ASTANA. KAZINFORM — Investıtsııalyq jobalardy ázirleý barysynda vedomstvoaralyq úılestirýge áli de kóp ýaqyt ketedi. Bul týraly Úkimettiń keńeıtilgen otyrysynda Prezıdent Qasym-Jomart Toqaev málim etti.

— Byltyr óńdeý ónerkásibi salasynda 180 ınvestıtsııalyq joba júzege asyryldy. Jobalardyń jalpy quny — 1,3 trıllıon teńge. Sonyń nátıjesinde osy saladaǵy ósim 6 paıyzǵa jýyqtady. Bul — sońǵy on jyldaǵy eń joǵary kórsetkish. Osy jaqsy úrdisti birjola ornyqtyryp, saqtap qalý kerek. Taǵy bir asa mańyzdy másele — ekonomıkaǵa ınvestıtsııa tartý. BUU málimetterine sáıkes, Qazaqstan bul kórsetkish boıynsha aıtarlyqtaı tabysqa qol jetkizgen. Degenmen toqmeıilsýge negiz joq, — dedi Qasym-Jomart Toqaev.

Memleket basshysy ınvestorlardyń máselesin shuǵyl sheshý úshin Investıtsııa shtaby qurylǵanyn eske saldy. Sonyń arqasynda bıýrokratııalyq kedergiler men quqyqtyq qarama-qaıshylyqtar joıylyp, keıbir jobalardy tezirek júzege asyrýǵa jol ashyldy. Alaıda basty maqsat — «jekelegen» problemalardy ǵana sheshpeı, eldegi tutas ınvestıtsııalyq ahýaldy jaqsartý.

— Investıtsııalyq jobalardy ázirleý barysynda vedomstvoaralyq úılestirýge áli de kóp ýaqyt ketedi. Úkimet basy artyq bıýrokratııadan arylyp, jedel jumys isteýi kerek. Memlekettik qyzmetshilerdiń qulyqsyzdyǵy jáne jaýapkershilik alýdan taısalýy kelisý rásimderi men sheshim qabyldaýdyń tym uzaqqa sozylýyna sebep bolyp otyr. Muny ashyq aıtqan abzal, — dedi Prezıdent.

Budan buryn habarlanǵandaı, Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy bastaldy.

Memleket basshysy 2024 jyldy elimiz oń kórsetkishtermen aıaqtaǵanyn aıtty.