Úkimet balalarǵa arnalǵan oıyn avtomattaryn rettemek

ASTANA. KAZINFORM — Úkimet balalarǵa arnalǵan oıyn avtomattaryn zańnamalyq turǵyda retteýdi josparlap otyr. Bul jaıynda Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.

- Halyqaralyq tájirıbe kórsetip otyrǵandaı (Kanada, Aýstralııa, Germanııa, Japonııa, Ońtústik Koreıa, Sıngapýr) «Kran» sııaqty avtomattar «oıyn-saýyq apparattary» sanatyna kiredi jáne tehnıkalyq standarttardyń mindettiligimen erekshelenedi. Avtomattar úshin júldeniń qunyna, olardy tirkeý tártibine qoıylatyn talaptar bar. Jasyryn algorıtmderdi paıdalanýǵa tyıym salynǵan jáne josyqsyz mehanızm úshin jaýapkershilik kózdelgen. Bizdiń elde «Kran» («Hvataı-ka», Crane Machine, Claw Machine, Grabber) sııaqty oıyn avtomattary azyq-túlik dúkenderinde, saýda oıyn-saýyq ortalyqtarynda, balalar oıyn aımaqtarynda, saıabaqtarda jáne halyq kóp jınalatyn oryndarda kóp ornalastyrylǵany ras, - dedi Úkimet basshysy.

Onyń aıtýynsha, qoldanystaǵy zańnamada aqshalaı utys kózdelmegen oıyn avtomattarynyń quqyqtyq mártebesin, olardy ornalastyrý tártibin, tehnıkalyq talaptaryn, jas shekteýlerin jáne baqylaý tetikterin naqty aıqyndaıtyn normalar jetkiliksiz. Osyǵan baılanysty qazirgi ýaqytta tıisti memlekettik organdar oıyn avtomattarynyń atalǵan sanatyn retteıtin zańnamalyq túzetýler ázirlep jatyr.

Olar mynalar:
- avtomattardy ornalastyrý oryndary boıynsha shekteý engizý;
- avtomattar men ondaǵy júldelerdi mindetti sertıfıkattaý;
- utys yqtımaldyǵyna áser etetin jasyryn mehanızmderdi paıdalanýǵa tyıym salý;
- avtomattardy ornalastyrý men paıdalanýdy retteıtin quzyretti organdardy anyqtaý;
- tutynýshylarǵa avtomattardyń jumys prıntsıpi jáne júldelerdiń quny týraly aqparat berý jónindegi mindet, sondaı-aq basqa da ózgerister.

- Osy túzetýler balalardy jáne ata-analardy táýekelderden qorǵaýǵa, oıyn-saýyq naryǵynyń ashyqtyǵyn arttyrýǵa, bıznes pen qoǵam múddeleri arasyndaǵy teńgerimdi qamtamasyz etýge múmkindik beredi. Úkimet depýtattar korpýsymen birge osy salany retteý boıynsha jumysty jalǵastyratyn bolady, - dedi Oljas Bektenov.

Buǵan deıin senator Ǵalıasqar Sarybaev sońǵy ýaqytta «kran» túrindegi oıyn avtomattarynyń kúrt kóbeıip jatqanyna alańdaýshylyq tanytqan edi.