Úkimet balalar qaýipsizdigimen baılanysty 58 myńnan astam ınternet-resýrsty buǵattady
ASTANA. KAZINFORM - Úkimette QR Premer-mınıstriniń orynbasary Ermek Kósherbaevtyń tóraǵalyǵymen kámeletke tolmaǵandardyń qaýipsizdigin qamtamasyz etý, olardyń quqyqtaryn qorǵaý jáne quqyq buzýshylyqtyń aldyn alý máseleleri boıynsha keńes ótti.
Úkimettiń baspasóz qyzmetiniń habarlaýynsha, jıynda sondaı-aq zorlyq-zombylyqtyń, býllıngtiń aldyn alý jáne balalardyń jazǵy demalysyn qaýipsiz uıymdastyrý sharalary qaraldy.
Keńes barysynda balalarǵa qatysty qylmystardyń aldyn alýǵa baǵyttalǵan memlekettik organdar qabyldap jatqan júıeli sharalar talqylandy. Ásirese, kámeletke tolmaǵandarǵa qatysty seksýaldyq sıpattaǵy qylmystar úshin jaýapkershilikti kúsheıtýge, profılaktıkalyq jumysty jandandyrýǵa jáne balalar arasynda qaýipsiz minez-qulyq mádenıetin qalyptastyrýǵa baǵyttalǵan zańnamalyq ári ınstıtýtsıonaldyq ózgeristerge basa nazar aýdaryldy.
«Ákimdikter bul jumysqa belsendi aralasýy tıis. Ata-analarmen jáne ustazdarmen túsindirý jumystaryn júrgizip, mektep jáne medıtsına psıhologtarymen tyǵyz baılanys ornatýy qajet. Sonymen qatar jazǵy saýyqtyrý maýsymyna daıyndyqty únemi baqylaýda ustaý kerek. Balalar quqyqtary jónindegi ýákilder ınstıtýtymen júıeli jumys júrgizý mańyzdy. Onyń qyzmeti tek áreket etýge emes, aldyn alýǵa da baǵyttalýy tıis. Biz balalardyń ómirine qaýip tónýine jol bere almaımyz, barlyq ýákiletti organdar aldyn ala áreket etýi qajet», — dedi Ermek Kósherbaev.
Balalardyń jazǵy kezeńdegi qaýipsizdigin qamtamasyz etý boıynsha profılaktıkalyq sharalar aıasynda keshendi jumystar júzege asyrylyp jatyr. Kámeletke tolmaǵandardyń jynystyq qol suǵylmaýshylyǵyna qarsy qylmystar úshin qylmystyq jaýapkershilik kúsheıtildi. Býllıng úshin jáne 16 jasqa deıingi balalardy qoǵamdyq kólikten kúshtep túsirý jaǵdaılaryna baılanysty ákimshilik jaýapkershilik engizildi. 58 myńnan astam zańsyz ınternet-resýrs, onyń ishinde balalardy zańsyz áreketterge tartý belgileri bar 11 arna buǵattaldy.
«Árbir tórtinshi jol-kólik oqıǵasy balalardyń qatysýymen oryn alady. Sondyqtan biz balalardy tasymaldaıtyn barlyq avtobýstardy tekserýdi kúsheıttik. Qajet bolǵan jaǵdaıda polıtsııa bir avtobýsty da jol boıy ilesip júrýge daıyn», — dedi Іshki ister mınıstriniń orynbasary Igor Lepeha.
Balalardyń jazǵy demalysyn qaýipsiz uıymdastyrýǵa erekshe kóńil bólindi. Ákimdikterge balalar oınaıtyn sporttyq alańdardyń qaýipsizdigi, jaraqtandyrylýy men jaramdylyǵy boıynsha tekseris júrgizý tapsyryldy. Aýdan jáne aýyl ákimderi bul baǵytta tikeleı jaýapty bolady. Sonymen birge páter ıeleriniń kooperatıvi (PIK) men múlik ıeleriniń birlestigi (MIB) arqyly turǵyndarǵa terezelerge arnaıy qorǵanys bekitkishterin ornatý qajettigi túsindirilýi tıis, bul balalardyń terezeden qulap ketý jaǵdaılarynyń aldyn alýǵa baǵyttalǵan.
Ermek Kósherbaev erekshe bilim berý qajettilikteri bar, múmkindigi shekteýli balalardyń, sondaı-aq jetim jáne ata-anasynyń qamqorlyǵynsyz qalǵan balalardyń jazǵy demalysqa tolyqtaı qamtylýy mańyzdy ekenin aıtty. Osy maqsatta óńirler arasynda yntymaqtastyq uıymdastyrylady: balalar kıeli jerler men tarıhı oryndarǵa saıahattap, túrli shyǵarmashylyq jáne tanymdyq jazǵy jobalarǵa qatysady. Bul rette balalardyń ómiri men densaýlyǵy jolda da, demalys ornynda da tolyqtaı qorǵalady.
Keńes qorytyndysy boıynsha vıtse-premer barlyq ýákiletti memlekettik organdarǵa vedomstvoaralyq úılestirýdi kúsheıtýdi, jazǵy kezeńge josparlanǵan sharalardyń oryndalýyn qatań baqylaýdy jáne balalardyń quqyqtary men qaýipsizdigin qamtamasyz etýge baǵyttalǵan jańartylǵan keshendi jospardy Úkimetke usynýdy tapsyrdy.
Osyǵan deıin Sanıtarııalyq-epıdemıologııalyq baqylaý komıteti lagerlerdiń jazǵy demalysqa daıyndyǵyn baqylaýǵa kiriskeni týraly jazdyq.