Úkimet azyq-túlik sektorynda ımportty almastyrýǵa bolatyn segmentterdi aıqyndady
ASTANA. KAZINFORM – Azyq-túlik sektorynda ımportty almastyrýǵa bolatyn segmentterdi aıqyndaldy. Bul týraly Úkimet otyrysynda Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.
- Іshki naryqty otandyq taýarlarmen júıeli túrde qamtamasyz etý úshin «Investıtsııalarǵa tapsyrys» baǵdarlamasy iske asyrylýda. Búginde ınflıatsııalyq qysymnyń negizgi sebepteriniń biri – tutyný jáne tutyný emes segmentterde otandyq óndiristegi birqatar bazalyq taýarlardyń tapshylyǵy. Osyǵan baılanysty salalyq mınıstrlikter ımportty almastyrýǵa bolatyn segmentterdi aıqyndap, ishki naryqty otandyq taýarlarmen tolyqtyrý múmkindikterin anyqtaýda.
Al «Báıterek» holdıngi «Investıtsııalarǵa tapsyrys» aıasynda ınvestıtsııalyq jobalar pýlyn qalyptastyrý úshin keshendi due diligence júrgizedi. Bul jumys turaqty negizde júrgiziletin bolady. Bizdiń maqsat – ishki naryqty otandyq óndiris taýarlarymen qamtamasyz etý jáne ımportqa táýeldilikti tómendetý, - dedi vıtse-premer.
Onyń málimetinshe, qazirgi ýaqytta azyq-túlik sektorynda 12 baǵyt jáne azyq-túlikke jatpaıtyn sektorda 24 baǵyt aıqyndaldy.
Azyq-túlik baǵyty agroónerkásiptik keshen men azyq-túlik qaýipsizdiginiń negizgi segmentterin qamtıdy. Olardyń qatarynda et, sút, qus eti, astyq, qant, jemis-kókónis jáne balyq ónimderin óndirý men qaıta óńdeý, jylyjaı keshenderin damytý, kókónis saqtaý ınfraqurylymy men aýyl sharýashylyǵy shıkizatyn qaıta óńdeý bar. Azyq-túlikke jatpaıtyn sektor ımport úlesi joǵary taýarlardy óndirýge baǵyttalǵan. Bul – jeńil ónerkásip ónimderi, qurylys materıaldary, turmystyq tehnıka jáne turmystyq hımııa óndirisi. Bul bastamalardyń mańyzdy quramdas bóligi – ondaǵan mıllıard dollar kóleminde aýqymdy qarjylandyrýdy qamtamasyz ete alatyn kapıtaldandyrylǵan damý qarjy ınstıtýttary,, - dedi Serik Jumanǵarın.
Aıta keteıik, Úkimet otyrysynda ekonomıkany odan ary ártaraptandyrý tásilderi pysyqtalyp jatyr.