Úkimet azyq-túlik baǵasyna baqylaýdy kúsheıtedi
ASTANA. KAZINFORM – Inflıatsııany turaqtandyrý máseleleri boıynsha ótken aptalyq keńeste vıtse-premer – ulttyq ekonomıka mınıstri Serik Jumanǵarın Saýda jáne ıntegratsııa mınıstrligine azyq-túlik qorjynyna tereń taldaý júrgizip, onyń quramyna enetin taýarlardyń baǵasyn turaqtandyrýǵa baǵyttalǵan naqty sharalar ázirleýdi tapsyrdy.
Qarasha aıynyń alǵashqy eki aptasynda Qazaqstanda áleýmettik mańyzy bar azyq-túlik taýarlarynyń jalpy baǵasy 0,1% ósti.
Birqatar kókónistiń baǵasy arzandaýda. Mysaly sábiz 1,7%-ǵa, oramjapyraq 1,8%-ǵa, pııaz 0,4%-ǵa arzandady. Degenmen, kartop baǵasy ósip otyr. Ol sońǵy aptada 0,2%-ǵa, qarashanyń alǵashqy eki aptasynda 2,2%-ǵa kóterildi. El boıynsha kartoptyń ortasha baǵasy – kılogramyna 188 teńge.
Saýda jáne ıntegratsııa birinshi vıtse-mınıstri Aıjan Bıjanovanyń málimetinshe, kartop baǵasynyń sońǵy 4-5 aptada 4,5%-ǵa qymbattaýyna eksporttyń qaıta jandanýy áser etken.
«Eki aıda kartop eksporty 300 myń tonnany qurady. Al jaqyn ýaqytqa josparlanǵan eksporttyq kelisimsharttar kólemi shamamen 200 myń tonna. Osylaısha, biz eldiń azyq-túlik qaýipsizdigi úshin qaýipsiz bolyp sanalatyn 500 myń tonnalyq josparly shekke jaqyndap kelemiz», - dedi Aıjan Bıjanova.
Vıtse-premer Saýda jáne ıntegratsııa mınıstrligine kartop qorynyń jetkilikti kólemin qamtamasyz etý máselesin Syrtqy saıasat jáne halyqaralyq ekonomıkalyq uıymdarǵa qatysý jónindegi vedomstvoaralyq komıssııanyń qaraýyna engizýdi tapsyrdy.
Qarashanyń eki aptasy ishinde taýyq jumyrtqasy men qus etiniń baǵasy da 0,4%-ǵa ósti. Buǵan negizinen jem-shóp pen ımporttyq quramdas bólikterdiń qymbattaýy sebep bolyp otyr.
Aıjan Bıjanovanyń aıtýynsha, kúnbaǵys maıyn óndirýshiler qus fabrıkalaryn jem óndirisine qajetti arzandatylǵan maı kólemimen qamtamasyz etken. Baǵany ustap turý úshin arzandatylǵan astyq ta qajet.
Osyǵan baılanysty Serik Jumanǵarın Azyq-túlik korporatsııasyna qysqa merzimde qus fabrıkalaryn rezervten jemdik astyqpen qamtamasyz etýdi jáne aýyl sharýashylyǵy jármeńkelerinde qoljetimdi qus etiniń kólemin arttyrýdy tapsyrdy.
Qaraqumyq jarmasynyń baǵasy qarasha aıynyń alǵashqy eki aptasynda 1,3%-ǵa qymbattaǵandyqtan, Azyq-túlik korporatsııasyna bul ónimniń qosymsha kólemin turaqtandyrý qorlaryna tikeleı satyp alyp berý arqyly tolyqtyrý mindeti júkteldi.
«Kommýnaldyq qyzmet tarıfterin ósirý ýaqytsha toqtatylǵan. Qazirgi tańda ınflıatsııaǵa yqpal etip otyrǵan jáne memlekettik sharalarmen retteýge bolatyn negizgi faktor - azyq-túlik taýarlary. Bul tek áleýmettik mańyzy bar ónimderge ǵana emes, azyq-túlik qorjynyna kiretin ári memlekettik retteý aıasynan tys qalǵan barlyq taýarlarǵa da qatysty. Saýda jáne ıntegratsııa mınıstrligi azyq-túlik qorjynynyń quramyna taldaý júrgizip, baǵany turaqtandyrýǵa baǵyttalǵan naqty usynystar ázirleýi tıis», - dedi Serik Jumanǵarın.
Sondaı-aq taýar aınalymy tolyq qadaǵalanýy qajet. Artyq deldaldardy joıý, baqylaý men qujat aınalymyn kúsheıtý — naryqtyń ashyqtyǵyn arttyrýǵa jáne shyǵyndardy azaıtýǵa múmkindik beredi. Bul óz kezeginde baǵanyń qoljetimdi deńgeıde saqtalýyna yqpal etedi.
Aıta keteıik, ShQO-da azyq-túlik baǵasyn negizsiz kótergen 30-ǵa jýyq kásipker jaýapqa tartyldy.