Úkimet azamattarǵa áleýmettik kómek berý júıesin qaıta qaraıdy
ASTANA. KAZINFORM – Úkimet azamattarǵa áleýmettik kómek berý júıesin qaıta qaraýy kerek. Bul týraly Aýyl sharýashylyǵy qyzmetkerleriniń birinshi forýmynda Memleket basshysy Qasym-Jomart Toqaev aıtty.
«Úkimet azamattarǵa áleýmettik kómek berý júıesin qaıta qaraýy kerek. Soǵan sáıkes tıisti tapsyrma berildi. Memleketten beriletin ataýly áleýmettik kómekti shyn máninde muqtaj azamattar alýǵa tıis. Alaıda keıbir aýyldyq jerde bir otbasydan birneshe adam ataýly áleýmettik kómek alatyn jaǵdaılar jıi kezdesedi. Ókinishke qaraı ondaı azamattarymyz jumys istep, eńbek etýge de qulyqsyz. Sebebi memleketten túsetin járdemge senedi. Bul, árıne, durys emes. Túptep kelgende, mundaı áreket áleýmettik masyldyqty týǵyzyp otyr», - dedi Memleket basshysy.
Prezıdent Ádiletti Qazaqstandy qurý jolynda naqty qadamdar jasap jatqanymyzdy aıtty.
«Barlyq saladaǵy jumystyń ashyq bolýyna kóńil bólip otyrmyz. Osy oraıda azamattarymyzdyń tabysyn jappaı deklaratsııalaýdyń mán-mańyzy zor. Bul talap 2021 jyldan beri birtindep engizilip jatyr. Alǵashqy úsh kezeńde 4 mıllıonnan astam adam deklaratsııa tapsyrdy. Olardyń qatarynda memlekettik qyzmetshiler, kvazımemlekettik sektordaǵy basshylar, kásipkerler jáne osy sanatqa kiretin azamattardyń jubaılary bar. Kelesi jyly taǵy 8 mıllıonǵa jýyq adam deklaratsııa tapsyrady dep josparlanyp otyr. Alaıda bir máseleni eskerý qajet. Jappaı deklaratsııa tapsyrý tujyrymdamasy osydan 14 jyl buryn qabyldanǵan. Sodan beri elimizde tsıfrlandyrý isi jáne fınteh salasy qarqyndy damyp kele jatyr. Túrli memlekettik mekemelerge ortaq málimetter bazasy paıda boldy. Qarjy jáne salyq baqylaýy kúsheıdi. Demek osyndaı aýqymdy ózgeristerden keıin tórtinshi, ıaǵnı, sońǵy kezeńde azamattardy deklaratsııa tapsyrýǵa mindetteý qanshalyqty oryndy degen suraq týady. Úkimet bul máseleni jan-jaqty pysyqtaýy qajet», - dedi Memleket basshysy.
