Úkimet aýyldyq okrýgterdiń bıýdjetine jekelegen salyq túsimderin bermek
ASTANA. KAZINFORM – Aýyldyq okrýgterdiń bıýdjetine jekelegen salyq túsimderin berý máselesi pysyqtalyp jatyr. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Búginge aýyldyq okrýgterdiń bıýdjetteri 25 túrli salyqtyq jáne salyqtyq emes túsimder, sondaı-aq aýdandyq bıýdjetten beriletin transfertter esebinen qalyptastyrylady. 2025 jyldyń qorytyndysy boıynsha aýyldyq deńgeıdegi bıýdjetterge is júzinde 442,3 mlrd teńge túsken. Onyń ishinde menshikti kirister - 147,0 mlrd teńge nemese bıýdjettiń jalpy kóleminiń 33,2 paıyzy, - deıdi Oljas Bektenov.
Onyń aıtýynsha, qazirgi ýaqytta 2025 jylǵy túsimderge árbir aýyldyq okrýg bólinisinde taldaý júrgizilip jatyr.
- Kiris bazasyn keńeıtý maqsatynda 2026 jyldan bastap keń taralǵan paıdaly qazbalar, jerasty sýlary men emdik balshyqtar boıynsha paıdaly qazbalardy óndirý salyǵy aýyldyq okrýgterdiń bıýdjetterine berildi. Sondaı-aq jumys tobynyń aıasynda jekelegen salyqtyq túsimderdi, onyń ishinde zańdy tulǵalar men jeke kásipkerlerdiń múlik salyǵynyń 50 paıyzyna deıin (úlesi aýdandyq máslıhattyń sheshimimen aıqyndalady), qyzmettiń jekelegen túrlerimen tolyq kólemde aınalysý quqyǵy úshin lıtsenzııalyq alymdy IV deńgeıdegi bıýdjetke berý máselesi pysyqtalyp jatyr, - dep jazǵan.
Úkimet basshysynyń atap ótýinshe, osy túzetýler múddeli memlekettik organdarmen kelisilip, Úkimettiń tıisti qorytyndysy Prezıdent Ákimshiligine kelisýge jiberilgen.
- Bul túzetýler qabyldansa, aýyldyq okrýgterdiń bıýdjetterine 240 mlrd teńgege jýyq qosymsha túsimder túsedi, - dedi Oljas Bektenov.
Aıta keteıik, Prezıdent Qasym-Jomart Toqaev aýyl ákimderiniń dıalog-platformasynda aýyldyq okrýg ákimderi ózderiniń keńeıtilgen ókilettikterin tolyq iske asyryp, salyq túsimderin ulǵaıtý maqsatynda qoldanystaǵy aqparattyq platformalarmen jumys isteı bilýi qajet ekenin aıtqan bolatyn.