Úkimet aýyl sharýashylyǵynda óńdelgen ónim shyǵaratyn bıznesti qoldaýdy kúsheıtedi

ASTANA. KAZINFORM — Premer-mınıstr Oljas Bektenov Aýyl sharýashylyǵy mınıstrligine joǵary deńgeıde óńdelgen ónim shyǵaratyn bıznesti qoldaý quraldaryn keńeıtýdi tapsyrdy.

- Aýyl sharýashylyǵy ónimderiniń eksporty qurylymynda áli kúnge deıin astyq pen et sııaqty shıkizat túrleri basym. Memleket basshysy bul máselege birneshe ret nazar aýdardy. Sondyqtan tereń óńdelgen ónimder shyǵarýǵa kúsh salý qajet. Qazirdiń ózinde mundaı jobalar bar jáne olar tıimdiligin kórsetip otyr. Aýyl sharýashylyǵy mınıstrligine ákimdiktermen jáne «Báıterek» holdıngimen birlesip, joǵary deńgeıde óńdelgen ónim shyǵaratyn bıznesti qoldaý quraldaryn keńeıtýdi tapsyramyn, - dedi O. Bektenov Úkimet otyrysynda.

Onyń aıtýynsha, Qarjy jáne Aýyl sharýashylyǵy mınıstrlikteri aınalym qarajatyn nesıeleý merzimin eki jylǵa deıin uzartý máselesin sheshýi tıis.

- Aýyl sharýashylyǵy ónimderin qaıta óńdeý úlesin bıyl 70%-ǵa deıin jetkizýimiz kerek. Jalpy, atalǵan sharalar shıkizat eksportyna táýeldilikti azaıtady, al ósýge yqpal etetin jańa baǵyttar turaqty ekonomıkalyq damýǵa negiz bolady, - dedi Úkimet basshysy.

Budan buryn habarlanǵandaı, Úkimet azyq-túlik sektorynda ımportty almastyrýǵa bolatyn segmentterdi aıqyndady.