Úkimet aýyl sharýashylyǵy tehnıkasyn óndiretin otandyq kásipkerlerdi qoldaıdy
ASTANA. KAZINFORM — Úkimet otandyq aýyl sharýashylyǵy tehnıkasyn óndirýshilerdiń múddelerin eskere otyryp, qoldaý quraldaryn qaıta qarady.
Memleket basshysy Qasym-Jomart Toqaevtyń AÓK áleýetin kúsheıtý týraly tapsyrmasyna sáıkes mashına-traktor parkin jedel jańartý jáne jergilikti aýyl sharýashylyǵy mashınalaryn jasaý kásiporyndaryn damytý tetigi ázirlendi. Ónerkásip jáne qurylys mınıstrligi Aýyl sharýashylyǵy mınıstrligimen birlesip, Qazaqstanda analogtary shyǵarylatyn sheteldik aýyl sharýashylyǵy tehnıkalaryna sýbsıdııa berýden bas tartýdy kózdeıtin qujat qabyldady.
«Qazirgi ýaqytta elimizde túrli qýattylyqtaǵy jáne modıfıkatsııadaǵy traktor, astyq jınaý jáne jem-shóp jınaý kombaındarynyń 15-ten astam brendin shyǵaratyn 8 zaýyt jumys isteıdi. 2023 jyldyń qorytyndysy boıynsha otandyq óndirýshiler 113,5 mlrd teńgege 5 418 traktor, 99,1 mlrd teńgege 1 032 kombaın shyǵardy», — dep habarlady Úkimettiń baspasóz qyzmeti.
Buǵan deıin ımporttyq jáne otandyq tehnıkaǵa beriletin sýbsıdııalar kólemindegi aıyrmashylyq sheteldik óndirýshilerdiń paıdasyna boldy. Máselen, 70,2 mlrd ótemaqy kóleminiń 28,3 mlrd-y (40,4%) jergilikti kásiporyndardy qoldaýǵa, 41,9 mlrd-y (59,6%) ımportqa baǵyttaldy. Atalǵan tásil qazaqstandyq zaýyttardyń ónimderin satý kólemin azaıtty. Jańa tetik boıynsha sheteldik óndirýshilerdi sýbsıdııalaý úlesi shashamen 6 esege – 6,5 mlrd-qa (9,3%) deıin tómendetiletin bolady, bul rette otandyq óndirýshilerdiń úlesin 63,7 mlrd-qa (90,7%) deıin jetkizý josparlanyp otyr.
«Osylaısha, 2021 jyly «ST ESEMBLI» kásipornynda TUCANO 450 jáne TUCANO 580 kombaındaryn qurastyrý bastalǵan kezde Claas-pen arnaıy ınvestıtsııalyq kelisimshartqa qol qoıyldy. 2 jyldan keıin jergilikti óndirýshilerdiń komponentterin «Agromash Holdıng» AQ, «Qazaqstan Agro Innovatsııalyq Korporatsııasy» JShS, «ShyǵysMash Zavod» AQ, «Reimann» JShS jetkize bastady. Kásiporynda 2023 jyly 246 birlik ózdiginen júretin tehnıka jáne 158 tirkeme tehnıka qurastyryldy. Bıyl traktorlar qatary jańartylyp, keńeıtildi. Zaýyt iske qosylǵan sátten bastap óndirispen qamtamasyz etilgen jumys oryndarynyń sany 2 esege artty – qazirgi tańda kásiporynda 73 qyzmetker jumys isteıdi», — delingen habarlamada.
Sheteldik aýyl sharýashylyǵy tehnıkasyn sýbsıdııalaýdy alyp tastaýdyń Qazaqstanda óndirisi jolǵa qoıylmaǵan pozıtsııalarǵa, atap aıtqanda qant qyzylshasyn, maqta óndirýge, kartop, jemis-kókónis t.b. jınaýǵa mamandandyrylǵan tehnıkalarǵa qatysy joq. Bul jaǵdaıda óndiris eline qaramastan 25% deńgeıinde sýbsıdııalaý normatıvi qarastyrylǵan.
Jalpy, qazaqstandyq aýyl sharýashylyǵy mashınasyn jasaý kásiporyndary qazirgi tańda ózdiginen júretin tehnıka naryqtyń shamamen 80%-yn qamtıdy. Bul rette elimizde sharýalardyń shamamen 90%-yn shaǵyn jáne orta fermerler quraıdy, olar úshin jeńildikti lızıngtik quraldar men qoljetimdi tehnıka mashına-traktor parkin jańartýǵa múmkindik beredi.
