Úkimet aýyl sharýashylyǵy tehnıkasy óndirisin keńeıtý boıynsha sheteldik ınvestorlarmen kezdesti
ASTANA. KAZINFORM – Oljas Bektenov aýyl sharýashylyǵy tehnıkasyn óndirýshi álemdik kompanııalarmen kezdesý ótkizdi: Qazaqstanda óndiristi lokalızatsııalaý boıynsha jańa kelisimderge qol qoıyldy. Bul týraly Úkimettiń baspasóz qyzmeti habarlady.
Premer-mınıstr Oljas Bektenov Memleket basshysynyń mashına jasaýdy damytý jáne ımportty almastyrý jónindegi tapsyrmalary aıasynda Eýropa, Kanada jáne AQSh-tyń aýylsharýashylyq tehnıkalaryn shyǵaratyn jetekshi kompanııalary basshylarymen kezdesý ótkizdi. Kezdesýge qatysýshylar ónerkásip kooperatsııasyn tereńdetý, óndiristi lokalızatsııalaý jáne otandyq kásiporyndarǵa zamanaýı agrotehnologııalar engizý máselelerin talqylady.
Premer-mınıstr agrarlyq sektordyń ósip kele jatqan qajettilikteri aýyl sharýashylyǵy tehnıkasynyń turaqty jáne boljamdy naryǵyn qalyptastyratynyn atap ótti. Qazaqstan aýyl sharýashylyǵy alqaptarynyń kólemi boıynsha álemde altynshy orynda. Egis alqaptary shamamen 24 mln gektardy quraıdy. Ótken jyly aýyl sharýashylyǵynyń jalpy óniminiń kólemi 9 trln teńgeden asyp, 6%-dan astamǵa ósti. Astyq jınaý 26 mln tonnaǵa, maıly daqyldar 5 mln tonnaǵa jetti.
— Memleket basshysy Qasym-Jomart Toqaev aýyl sharýashylyǵy salasynyń tehnologııalyq áleýetin damytý men ony arttyrý máselesine aıryqsha mán beredi. Óndiris kóleminiń ósýi, ónimdiliktiń artýy jáne eksporttyq jetkizilimderdiń keńeıýi sharýalardy tehnıkalyq jabdyqtaýǵa qoıylatyn talaptardy kúsheıtip jatyr. Sondyqtan tehnıkany jańartý, onyń qoljetimdiligin qamtamasyz etý, otandyq óndirýshilerdi yntalandyrý salanyń ári qaraı damýynyń negizgi sharttary retinde qarastyrylady.
Qazaqstannyń jetekshi sheteldik óndirýshilermen seriktestigi turaqty ári ózara tıimdi sıpatqa ıe jáne uzaqmerzimdi kooperatsııaǵa baǵdarlanǵan. Úkimet jobalardy lokalızatsııalaýdan bastap syrtqy naryqtarǵa shyǵýǵa deıingi barlyq kezeńde qoldaý arqyly jańa óndirister qurý úshin qolaıly jaǵdaı jasaýǵa daıyn, — dep atap ótti Oljas Bektenov.
Elimizdiń egis alqaptarynda 130 myńnan astam traktor, shamamen 30 myń kombaın jáne 200 myńnan astam tirkemeli jáne aspaly tehnıka birligi paıdalanylýda. Bul rette ótken jyldyń qorytyndysy boıynsha tehnıka parkin jańartý deńgeıi 6,5%. Nysanaly maqsat — bul kórsetkishti jyl saıyn 10%-ǵa deıin jetkizý. Osy maqsatta memleket tarapynan qoldaý sharalarynyń júıeli tetigi qalyptastyrylǵan, onyń ishinde tehnıka satyp alýǵa jumsalatyn shyǵyndardyń 30%-na deıin sýbsıdııalaý, kredıtter men lızıng boıynsha júktemeni tómendetý, sondaı-aq otandyq óndiristegi tehnıka úshin 5% mólsherlememen jeńildetilgen qarjylandyrý usyný qarastyrylǵan. Qabyldanyp jatqan sharalar qazirdiń ózinde nátıje berýde — sońǵy eki jylda otandyq tehnıka satý kólemi 35%-ǵa artyp, 7,7 myńnan 10,4 myń birlikke deıin ósti.
Sonymen qatar suranys qurylymy anaǵurlym kúrdeli ári joǵary tehnologııalyq mashınalarǵa qaraı aýysýda. Búginde jyl saıyn 8 myńnan astam traktor jáne 1,2 myń kombaın shyǵaratyn 8 iri kásiporyn jumys istep tur. Іshki naryqtaǵy otandyq tehnıkanyń úlesi shamamen 90%-ǵa jetti.
Halyqaralyq seriktester lokalızatsııany odan ári tereńdetýge, tehnologııalar transferine, servıstik ınfraqurylymdy damytýǵa jáne Qazaqstan naryǵynda qatysýdy keńeıtýge qyzyǵýshylyq bildirdi. Tolyq tehnologııalyq tizbekti qalyptastyrý jáne otandyq sharýalar úshin zamanaýı joǵary tehnologııalyq jabdyqtardyń qoljetimdiligin arttyrý máseleleri talqylandy.
— Prezıdent pen Úkimettiń dáıekti ónerkásiptik saıasaty senimge berik negiz qalap otyr. Aldymen elimizge naryq kóshbasshysy John Deere keldi, mundaı jetistik ózgelerge kúshti sıgnal boldy: búgin biz basqa da jahandyq oıynshylardyń kelip jatqanyn kórip otyrmyz. Biz jańa tehnologııalardy qabyldap, ozyq standarttardy engizýge, tehnıkalyq mamandarymyzdyń biliktiligin arttyryp, fermerlerdi qazaqstandyq óndiristiń joǵary tehnologııalyq mashınalarymen qamtamasyz etýge daıynbyz, — dedi «AgromashHoldıng KZ» AQ prezıdenti Dınara Shúkijanova.
— Biz Qazaqstannyń uzaqmerzimdi yntymaqtastyqqa ashyqtyǵyn jáne ınvestorlar úshin jasalyp jatqan jaǵdaıdy joǵary baǵalaımyz. Byltyrǵy qarashada qol qoıylǵan Qostanaıdaǵy óndiristi lokalızatsııalaý jónindegi strategııalyq kelisim seriktestigimizdegi mańyzdy qadam boldy. Bizdiń kompanııa aldaǵy jyldary 3 myńǵa jýyq tehnıka shyǵarýdy josparlap otyr. John Deere Qazaqstandy Ortalyq Azııadaǵy negizgi strategııalyq áriptes retinde qarastyrady. Biz óndiristi odan ári lokalızatsııalaýǵa, ónimdilikti arttyrýǵa daıynbyz. Tsıfrlandyrý men aýyl sharýashylyǵyn turaqty damytýǵa nazar aýdara otyryp, zamanaýı tehnıka shyǵarýdy josparlap otyrmyz, — dep atap ótti John Deere kompanııasynyń TMD elderi boıynsha vıtse-prezıdenti Peter Zakse.
— Jańa tetikterdiń arqasynda aýyl sharýashylyǵy salasynyń túbegeıli jańa deńgeıine qol jetkizildi. Qalyptasqan ınvestıtsııalyq jáne ınstıtýtsıonaldyq ahýal Qazaqstandy uzaqmerzimdi negizde tehnologııalar transferti, jobalardy lokalızatsııalaý jáne damytý kontekstinde sheteldik ınvestıtsııalar úshin tartymdy alańǵa aınaldyrady. Sonymen qatar adamı kapıtaldyń mańyzdylyǵyn atap ótkim keledi. Biz oqytý jáne odan ári jumysqa ornalastyrý maqsatynda jańa baǵdarlamany iske qostyq, — dep atap ótti Eurasia Group AG bas operatsııalyq dırektory Sergeı Glokke.
Ónimi 40-tan astam elge taraıtyn, aýyl sharýashylyǵy tehnıkasyn óndirýshi jetekshi kompanııa Väderstad Group-tyń (Shvetsııa) dırektorlar keńesiniń múshesi Krıstına Stark Qazaqstanmen yntymaqtastyqty keńeıtýge múddeli ekenin aıtty: «Bizdiń kompanııa Qazaqstannyń turaqty seriktesi bolýdy jáne eldiń aýyl sharýashylyǵyn damytýǵa qatysýdy josparlap otyr. Ózara is-qımylymyzdyń áleýetin damytý qazaqstandyq sharýalardyń qajettilikterine baǵdarlanǵan jańa ónimder shyǵarýǵa múmkindik beredi.
Kompanııalardyń top-menedjerleri seriktestikti damytýǵa daıyn ekendigin bildirdi. Olardyń qatarynda Dewulf kompanııasynan — Hendrık Dekramer, Amity Technology — Maık Sprenger, Lindsay Corporation — Rıchard Garold, Frans Vervaet B.V. — Robın Vervat, Brandt — Fılıp Korjchak, Kuhn Group — Djekı Kırch jáne taǵy da basqalar bar.
Qazaqstan tarapynan ónerkásip jáne qurylys mınıstri Ersaıyn Naǵaspaevtyń, aýyl sharýashylyǵy mınıstri Aıdarbek Saparovtyń, «Báıterek» holdınginiń basqarma tóraǵasy Rýstam Qaraǵoıshınniń pikirleri tyńdaldy.
Kezdesý qorytyndysy boıynsha Qostanaıdaǵy Lokalızatsııa ortalyǵynyń óndiristik bazasynda Qazaqstanda aýyl sharýashylyǵy tehnıkasy óndirisin lokalızatsııalaýǵa baǵyttalǵan kópjaqty kelisimderge qol qoıý rásimi ótti.
Kelisim «AgromashHoldıng KZ» AQ, «Eurasia Group AG» JShS men álemdik jetekshi óndirýshiler — Väderstad Group, Dewulf, Lindsay Corporation, Amity Technology, Frans Vervaet B.V., Kuhn Group jáne Brandt kompanııalary arasynda jasaldy.
Ýaǵdalastyqtardy júzege asyrý salanyń áleýetin kúsheıtedi jáne Qazaqstannyń jahandyq ónerkásiptik óndiris júıesindegi mártebesin nyǵaıtýǵa baǵyttalǵan.
Aıta ketelik Qazaqstan Respýblıkasynyń Premer-mınıstri Oljas Bektenov Qazaqstanǵa resmı saparmen kelgen Premer-mınıstriniń ekonomıkalyq máseleler jónindegi orynbasary Zııazın ben Haısam Ál Saıdpen kezdesken edi.
