Úkimet astyq eksportyn qoldaýǵa qosymsha 7 mlrd teńge bóldi
ASTANA. KAZINFORM – Qarajat kólik shyǵystaryn sýbsıdııalaýdyń qoldanystaǵy baǵdarlamasy boıynsha memlekettiń mindettemelerin tolyq oryndaýǵa, sondaı-aq prıorıtetti sheteldik naryqtarǵa jetkizýdi odan ári yntalandyrýǵa baǵyttalady. Bul týraly Úkimettiń baspasóz qyzmeti habarlady.
Qosymsha qarjylandyrý qajettigi dándi daqyldardyń joǵary ónimdiligi men sheteldik satyp alýshylar tarapynan qazaqstandyq astyqqa degen suranystyń artýyna baılanysty týyndap otyr.
Bıyl kólik shyǵyndaryn sýbsıdııalaýǵa Úkimet rezervinen 31mlrd teńge bólindi. Bul qarajat qazaqstandyq ónimniń jańa eksporttyq baǵyttarǵa shyǵýyn, buryn bolǵan naryqtarǵa qaıtadan qol jetkizýdi jáne balamaly logıstıkalyq marshrýttar boıynsha alys shet elderge eksport kólemin ulǵaıtýdy qamtamasyz etti. Júzege asyrylǵan sharalardyń qorytyndysynda jańa jáne qalpyna keltirilgen naryqtarǵa astyq jetkizý kólemi 2,5 mln tonnadan asty.
Buǵan deıin 2026 jylǵa arnalǵan kólik shyǵystaryn sýbsıdııalaý baǵdarlamasyn keminde 30 mlrd teńge kóleminde qarjylandyra otyryp uzartý týraly sheshim qabyldanǵan bolatyn.
Qazaqstan Respýblıkasynyń Úkimeti agrarlyq sektordy damytý, eksporttyq áleýetti keńeıtý jáne otandyq óndirýshilerdi qoldaý jónindegi dáıekti saıasatty odan ári jalǵastyra beredi.
Aıta ketelik aýyldarda shaǵyn ónerkásiptik alańdar qurylady.