Úkimet Astananyń energetıkalyq ınfraqurylymyn damytýǵa 16,2 mlrd teńge qarjy bóldi
ASTANA. KAZINFORM – Memleket basshysynyń Astanadaǵy kommýnaldyq ınfraqurylymdy jańǵyrtý jónindegi tapsyrmasyn oryndaý aıasynda Úkimet rezervinen Astananyń ınjenerlik jáne energetıkalyq jelilerin damytýǵa qarjy bólindi. QR Premer-mınıstri Oljas Bektenov tıisti qaýlylarǵa qol qoıdy. Bul týraly Úkimettiń baspasóz qyzmeti habarlady.
Jobalardy júzege asyrý qarqyndy turǵyn úı qurylysy men qala halqy sanynyń ósýi jaǵdaıynda káriz, jylý jáne elektrmen jabdyqtaý júıeleriniń senimdi ári úzdiksiz jumysyn qamtamasyz etýge múmkindik beredi.
Jalpy qarjylandyrý kólemi 16,2 mlrd teńgeden asady.
Onyń 8,7 mlrd teńgesi sý burý ınfraqurylymyn salýǵa jáne jańǵyrtýǵa baǵyttalady. Atap aıtqanda, Astananyń Esil aýdanyndaǵy qoldanystaǵy tazartý qurylystarynan bastap Aqmola oblysyndaǵy Qarabıdaıyq kóline deıingi káriz kollektory qaıta jańǵyrtylady. Sonymen qatar Uly Dala, Hýseın ben Talal, Shyńǵys Aıtmatov kósheleri men Turan dańǵyly boıynan Esil ózenine deıin tazartylǵan aǵyn sýlardy aǵyzatyn kollektor salynady.
Kózdelgen jumystardy júzege asyrý 4,5 myń gektar aýmaqtaǵy jerústi jáne drenaj sýlaryn burýǵa, sondaı-aq táýligine 70 myń tekshe metrge deıingi sýdy tazartatyn nysandardyń turaqty jumysyn qamtamasyz etýge múmkindik beredi. Bul óz kezeginde Astanany odan ári damytýǵa qajetti ınfraqurylym qalyptastyrady.
7,5 mlrd teńge elordanyń energetıkalyq ınfraqurylymyn damytýǵa baǵyttalady. Bul qarajatqa qoldanystaǵy elektr jelilerine qosylatyn 110/20 kVt-tyq «Qarlyǵash» jabyq qosalqy stansasy salynyp, «Astana-Energııa» AQ-nyń JEO-2-degi №1 týrboagregaty jańǵyrtylady.
Jańa energonysan iske qosylǵannan keıin «Esil» jáne «Báıterek» qosalqy stansalaryna túsetin júkteme azaıyp, «Nurly jol» vokzaly mańy men Telman turǵyn alabyndaǵy shamamen 80 myń turǵyn turaqty elektrmen qamtamasyz etiledi. Qosymsha qýat jańa mektepter, emhanalar jáne basqa da áleýmettik nysandardy paıdalanýǵa berýge múmkindik beredi.
JEO-2-degi týrbınany jańǵyrtqannan keıin onyń elektr qýaty 30 MVt-qa – 80 MVt-tan 110 MVt-qa deıin artady. Bul elordadaǵy elektr energııasyn tutyný jyl saıyn ósip otyrǵanyna oraı energııamen jabdyqtaý senimdiligin kúsheıtedi.
Aıta keteıik, Astanada topyraqty zańsyz qazý men tasymaldaýǵa baqylaý kúsheıtildi.
