Úkimet arheologııalyq jumystardy zańsyz júrgizgenderge jazany kúsheıtýge nege qarsy
ASTANA. KAZINFORM — Búgin Májilistiń jalpy otyrysynda Ádilet vıtse-mınıstri Laýra Mersalımova Úkimet arheologııalyq jumystardy zańsyz júrgizgenderge jazany kúsheıtýge nege qarsy shyqqanyn túsindirdi.
— Arheologııalyq jumystardy zańsyz júrgizgeni úshin qylmystyq jaýapkershilikti kúsheıý boıynsha depýtattardyń usynysy Úkimet qorytyndysymen qoldaý tappady. Sebebi, statıstıkalyq derekterge sáıkes, Qylmystyq kodekstiń tıisti baby boıynsha 2022 jyly ǵana 2 quqyq buzýshylyq bolǵan. Sondyqtan, qoldanystaǵy qylmystyq sanktsııalardy kúsheıtý qanshalyqty oryndy degen suraq týyndady. Sonymen birge eń aldymen quqyq buzýshylyqtardy ashý jáne aldyn alý sharalaryn qabyldaý qajet sanaımyz. Ekinshi oqylymǵa deıin osy máseleni tıisti organdarmen jan-jaqty qarastyryp, quqyq qoldaý tájirıbesin nazarǵa alyp, taǵy talqylaýǵa daıynbyz, - dedi vıtse-mınıstr BAQ ókilderiliniń saýalyna oraı.
Aıta keteıik, Memleket basshysy Qasym-Jomart Toqaev 2024 jyly 15 naýryzda ótken Ulttyq quryltaıda arheologııa salasyna qatysty zańdardy jetildirý, lıtsenzııa berý isin retteý jáne arheologııalyq qazba jumystaryn zańsyz júrgizgeni úshin jazany kúsheıtý qajettigin aıtqan edi. Osyǵan oraı Parlament depýtattary ázirlegen tarıhı-mádenı mura obektilerin qorǵaý máseleleri týraly zań jobasynda arnaıy normalar kózdelgen edi. Alaıda normalardy Úkimet qoldamaı otyr.